وەرزشی عێراق بەهۆی بۆشایی یاساییەوە لە لێواری داڕمانە

ئاڤا نیوز

سەرۆکی لیژنەی ئۆڵۆمپی عێراق، بەتۆمەتی سپیکردنەوەی پارە و یارمەتیدانی سوپای پاسدارن، لەلایەن وەزارەتی گەنجینەی ئەمریکا خراوەتە لیستی ڕەش، بەمەش بۆشایی یاسایی لە لیژنەی ئۆڵۆمپی دروستبووە و دوور نییە زیانی گەورە لە وەرزشی عێراق بدات.

چیرۆکی سەرەکی: ڕۆژی 09-10-2025 وەزارەتی گەنجینەی ئەمریکا، عەقیل موفتن، سەرۆکی لیژنەی ئۆڵۆمپی عێراق و عەلی موفتنی برای خستە لیستی ڕەش، بەتۆمەتی دانانی بانکێکی بازرگانی و سپیکردنەوەی پارە و هاوکاریکردنی سوپای پاسداران و کەتائیبی حیزبوڵڵا، ئەمەش دۆخێکی ناهەمواری لەوەرزشی  عێراق هێناوەتە ئاراوە.

داواکاری فەرمی: لەماوەی چەند ڕۆژی ڕابردوو لیژنەی ئۆڵۆمپی جیهانی، داوای لە لیژنەی ئۆڵۆمپی عێراق کردووە کە دەبێت عەقیل موفتن لە کارەکەی لابدرێت، بەڵام ناوبراو پێداگرە لەسەر مانەوە و لەڕێگەی چەند پارێزەرێکەوە کار لەسەر ئەوە دەکات سزاکانی لەسەر لاببرێت، ئێستا بەشێوەی کاتی عەبدولسەلام خەلەف، جێگری یەکەمی عەقیل موفتن؛ ئەرکەکانی ڕایی دەکات.

لێدوانی فەرمی: سەردار ئیسماعیل، بەڕێوەبەری گشتی وەرزش لە هەرێمی كوردستان؛ بە ئاڤای گوت، "ئەگەر پێداگری موفتن بۆ مانەوە لە پۆستەکەی بەردەوام بێت و لیژنەی ئۆڵۆمپی عێراق هەنگاوی کردەیی بۆ چارەسەرکردنی ئەو بۆشاییە یاساییە نەنێت چ بە دانانی لیژنەی کاتی یان ئەنجامدانی هەڵبژاردن، چارەنووسی وەرزشی عێراق بەرەو داڕمان دەچێت، عێراق لە چالاکییە وەرزشییە جیهانییەکان سڕ دەکرێت."

ئەمەش بزانە: سڕکردنی لیژنەی ئۆڵۆمپی عێراق کاریگەری نەرێنی ڕاستەوخۆی لەسەر هەرێمی کوردستان دەبێت، ئەو یاریزانە کوردانەی بەناوی عێراق بەشداری لە پاڵەوانێتییە جیهانییەکان دەکەن، بێبەش دەبن.