یەكگرتوو: لەگەڵ پارتی هاوڕا بووین لەسەر نەخشەڕێگایەک بۆ بەغدا

ئاڤا نیوز

ئەمڕۆ پارتی دیموکراتی کوردستان و یەکگرتووی ئیسلامی کۆبوونەوە، ئەندامێکی شاندی یەکگرتوو ڕایگەیاند 'گفتوگۆ بۆ دانانی نەخشە ڕێگایەک بۆ ئەنجوومەنی نوێنەرانی عێراق کرا'.

چیرۆکی سەرەکی: ئەمڕۆ چوارشەممە، شاندێکی پارتی دیموکراتی کوردستان کە پێکهاتبوون لە وشیار زێباری، پشتیوان سادق، عەلی حوسێن سەردانی یەکگرتووی ئیسلامیان لە هەولێر کرد، لەگەڵ هادی عەلی، سەلاحەدین بابەکر و محەممەد هاودیانی کۆبوونەوە.

لێدوانی فەرمی: محەممەد هاودیانی، ئەندامی مەکتەبی سیاسیی و ئەندامی شاندی یەکگرتووی ئیسلامی بە ئاڤای ڕاگەیاند: ئێمە نەخشە ڕێگایەکمان لەگەڵ لایەنە براوەکانی هەڵبژاردنی ئەنجوومەنی نوێنەرانی عێراق لە ناوخۆی کوردستان هەیە، بۆ ئەوەی لەو ڕێگایەوە داکۆکی لە مافەکانی خەڵکی کوردستان بکەین، چونکە لایەنە سوونە و شیعەکان خۆیان ڕێکخستووە و تەفاهومیان هەیە، دەمانەوێ ئێمەش لە هەرێمی کوردستان لەیەکتێگەیشتن و نزیکبوونەوەمان هەبێت.

محەممەد هاودیانی ئەمانەشی وت:

٠ لە کۆبوونەوەکەی ئەمڕۆمان لەگەڵ پارتی، تەنیا باسی نەخشە ڕێگاکەمان بۆ ئەنجوومەنی نوێنەرانی عێراق کرد، ئەوانیش زۆر پێیان باشبوو، وتیان بۆچوونێکی وامان لەوبارەیەوە هەیە.

٠ ئەوەی ماوە کۆبوونەویەکە لەسەر ئاستی مەکتەبی سیاسیی لایەنە براوەکانی دیکەی هەڵبژاردنی ئەنجوومەنی نوێنەرانی عێراق بکەین، تا بزانین بۆچوونیان چییە.

٠ لە کۆبوونەوەکەی ئەمڕۆدا هیچ گفتوگۆیەک لەسەر بابەتی پێکهێنانی حکومەتی هەرێمی کوردستان و بەشداری یەکگرتووی ئیسلامی نەکرا، چونکە زووتر بڕیاری خۆمان داوە کە وەکو ئۆپۆزسیۆن دەمێنینەوە ناچێنە حکومەتەوە، ئەم بڕیارە ناگۆڕین.