ئەمریکا بۆ ئاڤا: سوورین لەسەر چەککردن و هەڵوەشاندنەوەی میلیشیاکانی نزیک لە ئێران لە عێراق

ئاڤا نیوز

ئەمریکا هۆشداری دەداتە میلیشیاکانی نزیک لە ئێران لە عێراق و دەڵێت، پێویستە بەپەلە میلیشیاکانی نزیک لە ئێران چەک بکرێن و هەڵبوەشێندرێنەوە.

وێنە گەورەکە: پێکهێنانی حکومەتی عێراق لەسەر ئاستی نێودەوڵەتی چاودێری دەکرێت و ئەمریکا و وڵاتانی ئەوروپاش داوا دەکەن میلیشیاکانی نزیک لە ئێران بەشداری لە پێکهێنانی حکومەتی داهاتووی عێراق نەکەن.

لێدوانی فەرمی: وتەبێژێک لە وەزارەتی دەرەوەی ئەمریکا بە ئاڤا میدیای ڕاگەیاند،  هانی سەرکردەکان لە هەرێمی کوردستان و عێراق دەدەین بە خێرایی حکومەتی هەرێمی کوردستان و عێراق پێکبهێنن. پێکهاتەی حکومەتی عێراق بابەتێکە بۆ عێراقییەکانە و تەنیا ئەوان بڕیاری لەسەر دەدەن. لەژێر سەرکردایەتی سەرۆک ترەمپدا، ئێمە کار بۆ پەیوەندییەکی نێوان ئەمریکا و عێراق دەکەین کە لەگەڵ بەرژەوەندییەکانی ئەمریکادا بگونجێت.

لە بەشێکی دیکەی لێدوانەکەیدا ئەو وتەبێژەی وەزارەتی دەرەوەی ئەمریکا وتی، وەک چۆن مارکۆ ڕوبیۆ، وەزیری دەرەوەمان بە ڕوونی ڕایگەیاند، ئەمریکا بەردەوام بووە و بەردەوامیش دەبێت لە قسەکردن بە ڕاشکاوی سەبارەت بە پێویستی بەپەلە چەککردن و هەڵوەشاندنەوەی ئەو میلیشیایانەی ئێران پاڵپشتییان دەکات، کە سەروەری عێراق لاواز دەکەن، هەڕەشە لە ئەمریکی و عێراقییەکان دەکەن و سامان و سەرچاوەکانی عێراق بۆ ئێران بەتاڵان دەبەن. سەرکردە عێراقییەکان باش دەزانن چی گونجاوە و چی گونجاو نییە لەگەڵ هاوبەشییەکی بەهێزی نێوان ئەمریکا و عێراق.

زانیاریی زیاتر: سەبارەت بە بوونی گرووپە چەکدارەکانی نزیک لە ئێرانیش لە عێراق وتیشی، بۆ ماوەی دەیان ساڵە، گرووپەکان کە لەلایەن ئێرانەوە پاڵپشتی دەکرێن تیرۆریان بەکارهێناوە بۆ هێرشکردنە سەر ئەمریکی و عێراقییەکان لە پێناو بەرژەوەندییەکانی تاران. ئەم گرووپانە ئابووری عێراق دەقۆزنەوە بۆ پارەدارکردنی چالاکییە تیرۆریستییەکانی ئێران لە عێراق، ناوچەکە و سەرتاسەری جیهاندا.