وتەبێژی وەزارەتی كارەبا: بەهۆی هێرشە درۆنییەکە ئاستی بەرهەمهێنانی كارەبا بەڕێژەی 80% كەم دەبێتەوە

ئاڤا نیوز

وتەبێژی وەزارەتی كارەبای هەرێمی كوردستان ڕایدەگەیەنێت، بەهۆی وەستانی ناردنی گاز لە كێڵگەی كۆرمۆرەوە بۆ وێستگەكانی كارەبا، ئاستی بەرهەمهێنانی وزەی كارەبا بە ڕێژەی 75% تاوەكو 80% كەمدەبێتەوە.

چیرۆكی سەرەكی: دوێنێ شەو بە درۆنی خۆکوژی، بە دوو جار هێرش کرایە سەر کێڵگەی کۆرمۆر لە چەمچەماڵ كە كۆگای غازی كێڵگەكەی كردووەتە ئامانج، بەهۆیەوە بەشێکی کێڵگەکە گڕی گرتووە و ناردنی غاز لە كێڵگەكەوە بۆ وێستگەكانی بەرهەمهێنانی كارەبا وەستاوە.

لێدوانی فەرمی: ئومێد ئەحمەد، وتەبێژی وەزارەتی كارەبای هەرێمی كوردستان بە ئاڤای ڕاگەیاند، بەهۆی بەئامانجگرتنی كێڵگەی كۆرمۆر، ناردنی غازی سروشتی بۆ وێستگەكانی کارەبا بەتەواوی وەستاوە و بەهۆیەوە وزەی كارەبا بە ڕێژەیەكی زۆر دادەبەزێت.

دووپاتیشی كردەوە، لە بڕینێكی لەناكاوی لەمجۆرە، سەرجەم یەكەكانی بەرهەمهێنانی كارەبا دادەبەزن، هەموو هەوڵێك دەدەین كە كوژانەوەی گشتی لە هێڵە گشییەكان ڕوونەدات، یان لانیكەم دەزگا و كاروبارە خزمەتگوزارییەكان نەوەستن.

زانیاریی زیاتر: وتەبێژی وەزارەتی كارەبا ڕاشیگەیاند، هێشتا نازانین بەتەواوی چی ڕوویداوە، تیمەكانمان دەچن بزانین ئاستی زەرەر و زیانەكان چەندە، ئەگەر تەنانەت ئەمشەو هەناردەكردنی غاز بۆ وێستگەكانی كارەبا دەستپێبكاتەوە، ئینجا زیانەكانی بۆ سەر وێستگەكانی بەرهەمهێنانی كارەبا بۆ ماوەی 24 كاتژمێر بەردەوام دەبێت.