پارێزگاری سلێمانی سەرکۆنەی تووندی هێرشەکەی سەر کێڵگەی کۆرمۆر دەکات

ئاڤا نیوز

پارێزگاری سلێمانی پەیامێکی دەربارەی هێرشەکانی شەوی ڕابردووی سەر کێڵگەی کۆرمۆر بڵاوکردەوە، جەخت لەوەدەکاتەوە پێویستە حکومەتی فیدراڵیی عێراق و کۆی لایەنە دەسەڵاتدارەکان؛ ئەرکی پاراستن و ئاسایشی هەموو وڵات لەئەستۆبگرن.

چیرۆکی سەرەکی: کاتژمێر 11:30 خولەکی شەوی چوارشەممە بە درۆن هێرش کرایە سەر کێڵگەی کۆرمۆر لە چەمچەماڵ، بەهۆیەوە بەشێکی کێڵگەکە گڕی گرتووە و هەناردەی غاز بۆ وێستگەکانی کارەبا ڕاگیرا، ئاستی بەرهەمهێنانی کارەبا کەمدەبێتەوە.

پەیامی فەرمی: د. هەڤاڵ ئەبوبەکر، پارێزگاری سلێمانی پەیامێکی بڵاوکردووەتەوە و دەڵێت، "پێویستە کۆتایی بەم شێوازە ناڕەواو نادەستوریی و نایاسایی و نامرۆڤانەیە بهێنرێت کە؛ لە دەرەوەی دامەزراوە دەوڵەتییەکان، مەترسیی و هەڕەشەو هێرشی لەم شێوانە درێژەپێدەدەن."

لە بەشێکی پەیامەکەی پارێزگاری سلێمانیدا هاتووە، کە هەڵنەگرتنی بەرپرسیارێتیی و ئاشکرانەکردنی ئەو کەس و لایەنانەی لە ڕابردوو ئێستادا ئەم تاوانانە دەرهەق بەهەموو سامان و ئاسایش و سەروەریی عێراق و هەرێمی کوردستان جێبەجێدەکەن؛ هاندەرو درێژەپێدەری ئەم ناڕەوایەتییانە دەبێت.