ئۆپەراسیۆنە هاوبەشەکانی عێراق: هێرشەکەی سەر کۆرمۆر تیرۆریستییە

ئاڤا نیوز

 

فەرماندەیی ئۆپەراسیۆنە هاوبەشەکانی عێراق دەڵێت، هێرشەکەی شەوی ڕابردووی سەر کێڵگەی غازی کۆرمۆر " تیرۆریستییە"  و ڕێوشوێنی یاسایی بەرامبەر ئەو کەسانە دەگیرێتەبەر کە دەستیان لەم کارە "خیانەتکارانە و ترسنۆکانە"دا هەیە.

وێنە گەورەکە: شەوی ڕابردوو هێرشکرایە سەر کێڵگەی غازی کۆرمۆر لە سنووری قەزای چەمچەماڵ و لە ئەنجامدا ئاگرێکی گەورە لە کۆگەیەکی غاز کەوتەوە، هێرشەکە هەرچەندە زیانی گیانی نەبوو بەڵام بەهۆیەوە بەرهەمهێنانی کارەبا بەڕێژەی 80% کەم بووەتەوە.

 

ڕاگەیێنراوی فەرمی: فەرماندەیی ئۆپەراسیۆنە هاوبەشەکانی عێراق سەرلەبەیانیی ئەمڕۆ پێنجشەممە لە ڕاگەیێنراوێکدا باسی لەوەشکردووە، کاتژمێر 11:30 خولەکی شەوی چوارشەممە، کێڵگەی غازی کۆرمۆر لە پارێزگای سلێمانی کەوتەبەر هێرش، لە ئەنجامدا یەکێک لە تانکە سەرەکییەکانی کۆگاکردن لەم کێڵگە گرنگەی غازدا سووتێنرا. 

 

ئەوەشی خستووەتەڕوو، هێرشەکە هیچ زیانێکی گیانی نەبوو، بەڵام هەڕەشەی ڕاستەوخۆیە بۆ سەر بەرژەوەندییەکانی گەلی عێراق و کردەوەیەکی "تیرۆریستییە" بە ئامانجی ڕێگریکردن و دواخستنی هەوڵەکان بۆ دامەزراندنی سەقامگیری ئەمنی و ئابووری.

 

فەرماندەیی ئۆپەراسیۆنە هاوبەشەکانی عێراق دەشڵێت، ئەم هێرشە کاردانەوەی نەرێنی لەسەر تۆڕی کارەبا بە تایبەتی لە پارێزگاکانی هەولێر و سلێمانی هەیە و زیان بە سامان و سەرچاوەکانی وزەی وڵات دەگەیەنێت، بۆیەش ئەوانەی لەپشت ئەم هێرشانەوەن سزای دادپەروەرانەی خۆیان وەردەگرن، ڕێوشوێنی یاساییش بەرامبەر ئەو کەسانە دەگیرێتەبەر کە دەستیان لەم کارە "خیانەتکارانە و ترسنۆکانەدا" هەیە.