قوباد تاڵەبانی: هێرشکردنە سەر کێڵگەی کۆرمۆر لەلایەن هێزی دەرەوەی دەوڵەت چیتر قبوڵکراو نییە

 

 

قوباد تاڵەبانی هێرشەکەی سەر کێڵگەی کۆرمۆر بە تاوانێکی "تیرۆرستیی گەورە" ناودەبات و دەڵێت، بەردەوامی ئەم هێرشانە لەلایەن هێزی دەرەوەی دەوڵەت چیتر قبوڵکراو نییە. قوباد تاڵەبانی بە ئەرکی  حکومەتی عێراقی دەزانێت کە ئەوانەی لە پشت ئەم هێرشەوەن بۆ رای گشتی ئاشکرا بکات.

 

 

چیرۆکی سەرەکی: کاتژمێر 11:30 خولەکی شەوی چوارشەممە هێرش کرایە سەر کێڵگەی کۆرمۆر لە چەمچەماڵ، بەهۆیەوە بەشێکی کێڵگەکە گڕی گرتوو و هەناردەی غاز بۆ وێستگەکانی کارەبا ڕاگیرا، دوای ڕووداوەکەش وەزارەتی کارەبا بڵاوی کردەوە بەهۆی هێرشەکەوە ئاستی بەرهەمهێنانی کارەبا کەم دەبێتەوە.

 

 

 

ڕاگەیێنراوی فەرمی: قوباد تاڵەبانی، جێگری سەرۆکوەزیرانی کوردستان دەڵێت، هێرشکردنەسەر کێڵگەی گازی کۆرمۆر، تاوانێکی تیرۆریستی گەورە و بە ئامانجگرتنی ژیان و گوزەرانی رۆژانەی خەڵک و ژێرخانی ئابووریی کوردستان و هەموو عێراقە. چەند بارەبوونەوەی ئەم جۆرە هێرشانە بۆسەر ژێرخانی ئابووریی کوردستان پەرەسەندنێکی مەترسیدارە و پێویستی بە هەنگاویی کردەییە.

 

 

 

زانیاریی زیاتر: قوباد تاڵەبانی بە ئەرکی حکومەتی فیدراڵی دەزانێت کە "بە خێرایی بکەران و ئەوانەی لە پشت ئەم هێرشەوەن بۆ ڕای گشتی ئاشکرا بکات و رووبەڕووی سزا و لێپرسینەوەی یاساییان بکاتەوە".

 

 

جێگری سەرۆکوەزیران هەروەها جەخت دەکاتەوە کە "بەردەوامی ئەم جۆرە هێرشانە لەلایەن گرووپ و هێزی دەرەوەی دەوڵەت چیتر قبوڵکراو نییە و ناسەقامگیریی سیاسی و ئەمنی لێ دەکەوێتەوە. هەربۆیە هەنگاوی سەرەکیی حکومەتی داهاتووی عێراق دەبێت کۆتاییهێنان بەم دۆخە و سزادان و کۆکردنەوەی گروپ و هێزە چەکدارەکانی دەرەوەی دەوڵەت بێت.