بافڵ تاڵەبانی لەبارەی هێرشەکەی سەر کۆرمۆر: دەبێت چەک تەنیا بەدەستی دەوڵەتەوە بێت و میلیشیاکان لەناوببرێن

ئاڤا نیوز

دوای تێپەڕینی زیاتر لە 12 کاتژمێر بەسەر هێرشە تیرۆرستییەکەی کێڵگەی کۆرمۆر، سەرۆکی یەكێتی ئیدانەی هێرشەکە دەکات و جەخت لەوە دەکاتەوە چەک تەنیا دەبێت بەدەست دەوڵەتەوە بێت. نەوەک لەدەست ئەو میلیشیایانە بێت کە لە دەرەوەی سەروەری یاسا کاردەکەن.

چیرۆکی سەرەکی: کاتژمێر 11:30ـی شەوی ڕابردوو، هێرش کرایە سەر کێڵگەی کۆرمۆر لە چەمچەماڵ، بەهۆیەوە بەشێکی کێڵگەکە گڕی گرت و هەناردەی غاز بۆ وێستگەکانی کارەبا ڕاگیرا، هاوکات ئاستی بەرهەمهێنانی کارەبا کەمبووەتەوە و زیانی زۆر بەر کێڵگەکە کەوتووە.

پەیامی فەرمی: بافڵ تاڵەبانی لە پەیامێکدا دەڵێت، "هێرشە تیرۆریستییەکەی سەر کێڵگەی غازی کۆرمۆر جێگای قبوڵ نییە، وەڵامدانەوەمان بۆ ئەم هێرشە یەکلاکەرەوە و تووند دەبێت"، ئامانجی هێرشەکە زیانگەیاندنە بە گوزەرانی هاونیشتمانیانمان لە هەرێمی کوردستان و عیراق و تێکدانی سەقامگیری وڵاتەکەمان.

لەبەشێکی دیکەی پەیامەکەی سەرۆکی یەکێتی جەخت لەوە دەکاتەوە کە چەک تەنیا دەبێت بەدەست دەوڵەتەوە بێت. ئەو میلیشیایانە کە لە دەرەوەی سەروەری یاسا کاردەکەن یان دەبێت هەڵبوەشێندرێنەوە یان لەناوببرێن.