یەکێتیی زانایان: هێرشەکەی کۆرمۆر فشار و بەربەست دروستکردنە لەبەردەم پێشکەوتنەکانی کوردستان

ئاڤا نیوز

 

یەکێتیی زانایانی ئایینیی ئیسلامیی کوردستان دەڵێت، هێرشەکەی سەر کۆرمۆر تێکدانی ئارامی شادەماری ژێرخانی ئابووری و فشارو بەربەست دروستکردنە لەبەردەم پێشکەوتنەکانی کوردستان.

 

چیرۆکی سەرەکی: کاتژمێر 11:30ـی شەوی ڕابردوو، هێرش کرایە سەر کێڵگەی کۆرمۆر لە چەمچەماڵ، بەهۆیەوە بەشێکی کێڵگەکە گڕی گرتوو و هەناردەی غاز بۆ وێستگەکانی کارەبا ڕاگیرا، هاوکات ئاستی بەرهەمهێنانی کارەبا کەمبووەتەوە و زیانی زۆر بەر کێڵگەکە کەوتووە.

 

ڕاگەیێنراوی فەرمی: یەکێتی زانایانی ئایینی ئیسلامیی کوردستان ڕاگەیێنراوێکی لەبارەی هێرشەکەی کۆرمۆر بڵاو کردەوە و دەڵێت، ئەم هێڕشەی شەوی ڕابردووی سەر کێڵگەی گازی کۆرمۆر، وێڕای ئەوەی کردەیەکی تیرۆرستی دوژمنکارانەو نامرۆڤانەیە، لەهەمان کات تێکدانی ئارامی شادەماری ژێرخانی ئابووری و فشار و بەربەست دروستکردنە لەبەردەم پێشکەوتنەکانی کوردستان.

لە بەشێکی دیکەی ڕاگەیێنراوەکەدا هاتووە، "بەپێی ئایینی ئیسلام زیانگەیاندن بە ژیانی خەڵک و بەرژەوەندیی گشتی و شێواندنی سامانی نیشتمانی و گوزەرانی هاوڵاتیان، تاوانێکی گەورەو کارێکی حەڕامە".

 

یەکێتیی زانایان دەڵێت، "بەتوندی ئیدانەی ئەو کردە تێکدەرانەیە دەکەین، کە دوورە لە هەموو بەهاو رەوشتیکی ئینسانی، تکامان وایە دەستی پشت ئەم کارە و بکەرانی ئەم کردە تیرۆرستییە، بدرێنە دادگاو لێپێچینەوەی توندیان لەگەڵ بکرێت و سزا بدرێن.