بەرهەمهێنانی غاز لە کۆرمۆر دەستی پێکردەوە

ئاڤا نیوز

 

دوای هێرشەکەی شەوی ڕابردووەی سەر کێڵگەی کۆرمۆر، جارێکی دیکە بەرهەمهێنانی غاز لە کێڵگەکە دەستی پێکردەوە و بە کەمتر لە 24 کاتژمێر غاز بۆ وێستگەکانی کارەبا ڕەوانە دەکرێت.

 

چیرۆکی سەرەکی: کاتژمێر 11:30ـی شەوی ڕابردوو،26-11-2025، هێرش کرایە سەر کێڵگەی کۆرمۆر لە چەمچەماڵ، بەهۆیەوە بەشێکی کێڵگەکە زیانی زۆری بەرکەوت و هەناردەی غاز بۆ وێستگەکانی کارەبا ڕاگیرا، ئەمەش بووەی هۆی کەمبوونەوەی کارەبا لە 24 کاتژمێرەوە بۆ پێنج کاتژمێر.

 

زانیاریی پەیامنێر: ئارام جەمال، پەیامنێری ئاڤا میدیا لە کەرکووک گوتی: بەرهەمهێنان لە غازی کۆرمۆر دەستی پێکردووەتەوە، بەشێکی زۆری کێڵگەکە دەستی بە کارکردن کردووەتەوە و تیمەکان کار لەسەر ئەوە دەکەن بە کەمتر لە 24 کاتژمێر ڕەوانەکردنەوەی غاز بۆ وێستگەکانی کارەبا دەست پێبکاتەوە.

 

ئەوەی پێویستە بیزانیت: ئەو بەشانەی پەیوەندییان بە بەرهەمهێنانی غاز و ڕەوانەکردنی غاز هەیە بۆ ویستگەکانی کارەبا هەیە کەمترین زیانیان بەرکەوتووە.

 

بەتەنیشت ئەم بابەتەوە: بەگوێرەی زانیارییەکانی پەیامنێری ئاڤا دوو تیمی پسپۆڕی تایبەت گەیشتوونەتە ناو کێڵگەی کۆرمۆر و لێکۆڵینەوە لە پاشماوەی ئەو هێرشە دەکەن بۆ ئەوەی یەکلایی بکەنەوە کە هێرشەکە مووشەکە یان درۆنە و دروستکراوی چ شوێنێکە.