ساڤایا لەبارەی هێرشەکەی کۆرمۆرەوە: ئەمریکا لێپرسینەوە لە هەموو گرووپە چەکدارەکانی عێراق دەکات

ئاڤا نیوز

مارک ساڤایا، نوێنەری سەرۆکی ئەمریکا بۆ عێراق، بە تووندی سەرکۆنەی هێرشەکەی سەر کێڵگەی غازی کۆرمۆر کرد و دەڵێت: " ئەمریکا بەدواداچوون بۆ هەموو گرووپێکی چەکداری نایاسایی و هەر لایەنێکی پشتیووانیان دەکات و ڕووبەڕوویان دەبێتەوە".

چیرۆکی سەرەکی : درەنگانی شەوی چوارشەممەی ڕابردوو 26-11-2025 هێرش کرایە سەر کێڵگەی غازی کۆرمۆر لە سنووری قەزای چەمچەماڵ و لە ئەنجامدا ئاگرێکی گەورە لە کۆگایەکی غاز کەوتەوە، هێرشەکە هەرچەندە زیانی گیانی نەبوو، بەڵام بەهۆیەوە هەناردەی غاز بۆ وێستگەکانی کارەبا ڕاگیرا و ئاستی بەرهەمهێنانی کارەبا بەڕێژەی 80%  کەم کرایەوە.

ڕاگەیێنراوی فەرمی: مارک ساڤایا، نوێنەری سەرۆکی ئەمریکا بۆ عێراق، لە بەیاننامەیەکدا کە لە ڕێگەی هەژماری خۆی لە تۆڕە کۆمەڵایەتییەکان ئەمڕۆ پێنجشەممە 27ـی تشرینی دووەمی 2025 بڵاویکردووەتەوە، ڕایگەیاند: گرووپە چەکدارەکان کە بەشێوەیەکی نایاسایی کار دەکەن، دوێنێ هێرشیان کردە سەر کێڵگەی غازی کۆرمۆر و پێویستە حکومەتی عێراق بەرپرسانی ئەم دەستدرێژییە دەستنیشان بکات و ڕادەستی دادگایان بکات.

زانیاریی زیاتر: ساڤایا ئاماژەی بەوەشدا،  بۆ ئاشکراکردنی ئەنجامدەرانی ئەم هێرشە، ئەمریکا بەتەواوی پشتیوانی هەموو ئەو هەوڵانە دەدات و بەدواداچوون و ڕووبەڕووبوونەوە و لێپرسینەوە لەگەڵ هەموو گرووپێکی چەکداری نایاسایی و ئەوانەش دەکرێت کە پشتیووانییان لێ دەکەن".

ئەمەش بزانە: نوێنەرەکەی ترەمپ بۆ عێراق دووپاتیکردەوە،  ئەمریکا پشتیوانی لە هەرێمێکی بەهێز لە چوارچێوەی عێراقێکی یەکگرتوو و سەقامگیردا دەکات،  هاوکات هانی بەغدا و هەولێریش دەدات بۆ ئەوەی هاوکارییە ئەمنییەکانیان قووڵتر بکەنەوە و کار بۆ پاراستنی ژێرخانی ئابووری و وزە بکەن.

قووڵتر: لە کۆتایی ڕگەیێنراوەکەی ساڤایا وتی، "پێکەوە بۆ پاراستنی سەرچاوەکانی عێراق و بەرگریکردن لە سەروەریی خاکەکەیی و مسۆگەرکردنی ئاسایش و خۆشگوزەرانی بۆ هەموو هاووڵاتییان بەردەوام دەبین.