بارەگای بارزانی بە تووندی ئیدانەی هێرشەکەی کۆرمۆر دەکات؛ دەبێت هەنگاوی کرداری بگیرێتەبەر

ئاڤا نیوز

بارەگای بارزانی سەبارەت بە هێرشە تیرۆریستییەکەی سەر کۆرمۆر هاتە دەنگ و زۆر بە تووندی ئیدانەی دەکات: کاتی ئەوە هاتووە هەنگاوی کرداری بگیرێتەبەر و ئەنجامدەرانیان سزا بدرێن.

چیرۆکی سەرەکی: کاتژمێر 11:30 خولەکی شەوی ڕابردوو بە درۆن هێرش کرایە سەر کێڵگەی کۆرمۆر لە چەمچەماڵ، بەهۆیەوە بەشێکی کێڵگەکە گڕی گرت و هەناردەی غاز بۆ وێستگەکانی کارەبا ڕاگیرا، ئاستی بەرهەمهێنانی کارەبا کەم کرایەوە.

ڕاگەیێنراوی فەرمی: ئەمڕۆ پێنجشەممە 27-11-2025، بارەگای بارزانی ڕایگەیاند، زۆر بە تووندی ئیدانەی ئەو هێرشە تیرۆریستییە دەکەین کە شەوی ڕابردوو کرایە سەر کێڵگەی کۆرمۆر. دەڵێت، ئەم هێرشە دژی ژێرخانی ئابووری و بەرژەوەندییەکانی هەرێمی کوردستان و عێراق و هەموو هاووڵاتیانە. 

- لە ڕاگەیێنراوەکەی بارەگای بارزانی هاتووە، سەرباری ئەوەی کە پێشتریش ئەو جۆرە هێرشە ناڕەوایانەی سەر هەرێمی کوردستان زۆرجار ئیدانە کراون، بەڵام تەنیا ئیدانە بووە و لەبەرامبەردا ئەنجامدەراندا هیچ ڕێکارێک نەکراوە و ئەو هێرشانە دووبارە بوونەتەوە.

- کاتی ئەوە هاتووە کە لەبەرانبەر ئەم دەستدرێژی و هێرشە ناڕەوایانەدا هەنگاوی کرداری بگیرێتەبەر و کۆتایی پێ بهێندرێت و ئەنجامدەرانیان سزا بدرێن.