هەردوو باڵیۆزی بەریتانیا و ڕووسیا هەماهەنگی وڵاتەکەیان لەگەڵ عێراق و هەرێمی کوردستان دووپات دەکەنەوە

ئاڤا نیوز

هەردوو باڵیۆزی بەریتانیا و ڕووسیا ئیدانەی هێرشەکەی سەر کێڵگەی غازی کۆرمۆر دەکەن و پابەندی وڵاتەکانیان بە هەماهەنگی لەگەڵ عێراق و هەرێمی کوردستان دووپات دەکەنەوە.

وێنە گەورەکە: هێرشە تیرۆریستییەکەی سەر کێڵگەی غازی کۆرمۆر کاردانەوەی فراوانی ناوخۆی و نێودەوڵەتی لێکەوتووەتەوە، بەشێک لە وڵاتان بە تووندی ئەنجامدانی ئەو کارەیان سەرکۆنە کردووە و ئیدانەیان کردووە و بە هەوڵێک بۆ تێکدانی ئاشتی ناوزەندی دەکەن. 

لێدوانی فەرمی: عیرفان سدیق، باڵیۆزی بەریتانیا لە عێراق بەئاڤا میدیای ڕاگەیاند: بەهەموو شێوەیەک سەرکۆنەی ئەو هێرشە بۆ سەر بەرژەوەندییەکانی دەوڵەتی عێراق و دامەزراوە هەستیارەکانی دەکەین.

زانیاریی زیاتر:  بەگوتەی عیرفان، پێویستە لێکۆڵینەوە و لێپرسینەوە لەگەڵ ئەجامدەرانی ئەم جۆرە هێرشانەی  دژی تواناکانی ئابووری و وزەن بکرێت، هەروەها دەبێت حکومەتی داهاتوو ڕێوشوێنی پێویست بۆ کۆتاییهێنان بە دۆسیەی چەکداماڵین و کۆکردنەوەی لە دەستی دەوڵەتدا بگرێتەبەر.

لەلایەکی دیکەوە: ئێلبروس کوتراشێڤ، باڵیۆزی ڕووسیا لە عێراق بە ئاڤا میدیای گوت: "بێگومان ڕووداوێکی دڵتەزێن بوو، هەرچەندە ئێمە هیچ سەبارەت بە وردەکارییەکانی نازانین، بەڵام هیوادارین لێکۆڵینەوە بکرێت و بگەنە ڕێکارێک بۆ ئاشکراکردنی تێوەگلاوان.

ئەمەش بزانە:  ئێمە گوێبیستی دەنگ و ناڕەزایەتین دژی ئەم دەستدرێژییە بۆ سەر دامەزراوە مەدەنییەکان کە زۆر جێی داخە، چاوەڕوانی ئەنجامی لێکۆڵینەوەی فەرمی دەکەین و لەگەڵ حکومەتی عێراقیش لە گفتوگۆ داین بۆ دۆزینەوەی چارەسەرێک بۆ ئەم کێشانە.

باکگراوند: کاتژمێر 11:30 خولەکی شەوی چوارشەممەی ڕابردوو 26-11-2025 بە درۆن هێرش کرایە سەر کێڵگەی کۆرمۆر لە چەمچەماڵ، بەهۆیەوە بەشێکی کێڵگەکە گڕی گرت و هەناردەی غاز بۆ وێستگەکانی کارەبا ڕاگیرا، ئاستی بەرهەمهێنانی کارەباش کەم کرایەوە.