دیندار زێباری: بەئامانجگرتنی کۆرمۆر پێشێلکارییەکی زەقی مافەکانی مرۆڤە

ئاڤا نیوز

ڕێکخەری ڕاسپاردە نێودەوڵەتییەکان لە حکومەتی هەرێمی کوردستان ڕایدەگەیەنێت، هێرشکردنە سەر ژێرخانی وزە و شارەکان، پێشێلکارییەکی ئاشکرای پرەنسیپە نێودەوڵەتییەکانە و داوای دەستوەردانی نێودەوڵەتی دەکات.

لێدوان فەرمی: دیندار زێباری، ڕێکخەری ڕاسپاردە نێودەوڵەتییەکان لە پەیامەکەیدا دەڵێت: "ئێمە بە تووندی سەرکۆنەی ئەم هێرشە تیرۆریستییە دەکەین، داوا لە کۆمەڵگەی نێودەوڵەتی و لایەنە پەیوەندیدارەکان دەکەین هەوڵی جددی بدەن بۆ ڕێگریکردن لە دووبارەبوونەوەی ئەم هێرشانە، هەروەها دەبێت ئەنجامدەران و پلاندانەرانی ئەم کارە تیرۆریستییە ئاشکرا بکرێن و بە زووترین کات ڕادەستی دادگا بکرێن".

 

لە لایەکی دیکەوە: بۆ لێکۆڵینەوە لە وردەکارییەکانی هێرشەکە، شاندێکی باڵای ئەمنی بە سەرۆکایەتیی عەبدولئەمیر شەممەری، وەزیری ناوخۆی عێراق و حەمید شەتری، سەرۆکی دەزگای هەواڵگری و بە یاوەری ڕێبەر ئەحمەد، وەزیری ناوخۆی هەرێم گەیشتوونەتە شوێنەکە.

زانیاریی بەدەستهاتوو: بەپێی زانیارییەکان، هێرشەکە شەوی چوارشەممە لە ڕێگەی "فڕۆکەی بێفڕۆکەوان"ـەوە ئەنجامدراوە و چەند ڕۆژێک بەر لە هێرشەکە، جموجۆڵی فڕۆکەی بێفڕۆکەوان لە ناوچەکە هەستی پێکراوە و زەنگی ئاگادارکردنەوە لێدراوە.