هەرێمی كوردستان لە كەرتی شیرەمەنی سوود لە ئەزموونی هۆڵەندا وەردەگرێت

ئاڤا نیوز

بەمەبەستی فراوانكردنی ئاڵوگۆڕی زانیاری لە كەرتی شیرەمەنی، كۆمپانیاكانی شیرەمەنیی هۆڵەندا، ئەزموونی كاركردنیان لەگەڵ هەرێمی كوردستاندا هاوبەشی پێ دەكەن.

چیرۆكی سەرەكی: ژمارەیەك كۆمپانیای بواری شیرەمەنیی هۆڵەندی، سەردانی هەرێمی كوردستانیان كردووە، مەبەستیانە زانیاری لە کەرتی شیرەمەنی بە شێوەیەکی کاریگەرتر و زیرەکانەتر، بە لەبەرچاوگرتنی کەشوهەوا و ئاوی هەرێمی کوردستان،  ئاڵوگۆڕ بكەن.

ڕاگەیێنراوی فەرمی: كونسوڵخانەی گشتیی هۆڵەندا لە هەرێمی كوردستان، لەبارەی سەردانی كۆمپانیا هۆڵەندییەكان ڕاگەیێنراوێكی بڵاوكردووەتەوە و ئاماژەی بەوە كردووە، كونسوڵخانەی هۆڵەندا بەیاوەری كۆمپانیاكانی كەرتی شیرەمەنی، چالاكی یەكترناسینی بازرگانی لەگەڵ لایەنە پەیوەندیدارە حكومییەكان لە شارەكانی هەولێر و سلێمانی ئەنجامداوە، بەئامانجی پەرەپێدانی تەواوكاریی بەهای زنجیرەیی بەرهەمە شیرەمەنییەكان.

ئەوەی پێویستە بیزانیت: لەمانگی حوزەیرانی ئەمساڵ، شاندی باڵای حكومەتی هەرێمی كوردستان و كۆمپانیا كوردستانییەكان لە كۆڕبەندی ئابووری و بازرگانیی هۆڵەندا بەشداربوون، و سێ گرێبەستی گرنگیان لەبوارەكانی شیرەمەنی، چاندنی تۆوی پەتاتە و بەكارهێنانی ژیری دەستكرد لە پەرەپێدانی كەرتی كشتوكاڵ لەنێوان كۆمپانیاكانی كوردستان و هۆڵەندا واژۆ كران؛ كە دەرفەتێكی گرنگی بۆ هێنانی وەبەرهێنەرانی هۆڵەندا و خاوەن پرۆژەكان بۆ هەرێمی كوردستان دروست كرد.

باكگراوند: بەئامانجی بەهێزكردنی ژێرخانی ئابووریی هەرێمی كوردستان و فرەچەشنكردنی سەرچاوەكانی داهات، كابینەی نۆیەمی حكومەتی هەرێمی كوردستان بە ڕاسپاردەی سەرۆكوەزیران مەسرور بارزانی، پرۆگرامێكی درێژخایەنی داڕشتووە، بۆ ئەوەی كەرتی تایبەت لەپاڵ كەرتی حكومی بەشداریی كارای هەبێت لە پەرەپێدانی چالاكییە ئابووری و بازرگانییەكاندا.