لە ڕۆژهەڵاتی كوردستان سێ خانمی كورد بە تۆمەتی چالاكیی سیاسی سزا دراون

ئاڤا نیوز

 

دەستگیركردن و سزادانی خانمانی كورد بە تۆمەتی چالاكیی سیاسی لە ڕۆژهەڵاتی كوردستان و ئێران بەردەوامە؛ خانمێكی سنە حوكمی سێ ساڵ زیندانیكردنی بەسەردا سەپێنراوە و دوو ژنی دیكەش دیلكراویش، لە چارەسەریی پزیشكی بێبەش كراون.

 

چیرۆكی سەرەكی: دەستگیركردنی ژنانی چالاكوان بە پاساوی جۆراوجۆر لەلایەن هێزە ئەمنییەكانی ئێرانەوە لە ناوچە جیا جیاكانی ڕۆژهەڵاتی كوردستان و ئێران بەردەوامە، لە نوێترین پێشهاتیشدا خانمە چالاكوانێكی كورد، حوكمی سێ ساڵ زیندانیكردنی بەسەردا سەپێنراوە و دوو چالاكوانی دیلكراوی ژنیش، لە گرتووخانەی ئێڤین لە چارەسەریی پزیشكی بێبەش كراون.

 

بڵاوكراوەی فەرمی: ماڵپەری دەنگی دەستگیرکراوەکانی کورد و ئێران ڕایدەگەیێنێت، خانمێكی كوردی دانیشتووی شاری سنە بەناوی شەیدا عەزیزی دەستگیر كراوە، و  لەلایەن لقی یەکەمی دادگای شۆڕشی سنەوە، بە تۆمەتی “هەوڵدان بۆ تێکدانی ئاسایشی نیشتمانی” سزای سێ ساڵ زیندانییکردنی بەسەردا سەپێندراوە.

 

ئەو خانمە کوردە لەکاتی شەڕی دوازدە ڕۆژەی نێوان ئێران و ئیسرائیل، لە شاری سنە بەبێ فەرمانی دادوەر دەستگیر کرا و ڕەوانەی زیندانی شارەکە کراوە.

 

لەلایەكی دیكەوە: دوو زیندانی سیاسیی ژن، لە گرتووخانەی ئێڤین بە ناوەکانی مەرزییە فارسی و فەرووغ تەقی پوور، دۆخی تەندروستییان تێكچووە و بێبەشکراون لە خزمەتگوزاری پزیشکی و چارەسەركردنیان، هاوكات دووچاری زیادبوونی فشاری ئەمنی بوونەتەوە.

 

ئەوەش بزانە: ئەو دوو ژنە زیندانییە سیاسییە لە ساڵی 2023 هاوکات لەگەڵ ساڵیادی خۆپیشاندانی شۆڕشی”ژن ژیان ئازادی” دەستگیر کران و ڕەوانەی زیندانی ئێڤین کران، دواتر لە لایەن دادوەر ئیمان ئەفشاری لە دادگای شۆڕشی تاران بە تۆمەتی” پەیوەندیکردن بە ئۆپۆزسیۆنەکانی دژ بە ئێران” هەر یەکێکیان سزای 15 ساڵ زیندانییکردنیان بەسەردا سەپێندرا.