هەناردەکردنەوەی غازی شلی ماڵان لە کێڵگەی کۆرمۆرەوە دەستی پێکردەوە

ئاڤا نیوز

 

دوای هێرشەکەی چوارشەممەی ڕابردوو بۆ سەر کێڵگەی کۆرمۆر، بۆ یەکەمجار هەناردەکردنەوەی غازی شل لەو کێڵگەوە دەستی پێکردەوە.

 

چیرۆکی سەرەکی: شەوی چوارشەممەی هەفتەی ڕابردوو، کاتژمێر 11:30ـی شەو، بە مووشەک هێرشکرایە سەر کێڵگەی گازی کۆرمۆر لە چەمچەماڵ، بەهۆیەوە زیانی زۆر بەر کێڵگەکە کەوت و بەرهەمهێنانی غاز و هەنارەدەکردنی لە کێڵگە وەستا هاوکات بەرهەمهێنانی کارەبای نیشتمانی دابەزی و پێدانی کاتژمێرەکانی کارەبا لە ڕۆژێکدا کەمبووەوە بۆ پێنج کاتژمێر.

 

زانیاریی پەیامنێر: دیار محەممەد، پەیامنێری ئاڤا میدیا گوتی: کاتژمێر 11:30 خولەکی بەیانی ئەمڕۆ، 29-11-2025، هەناردەکردنەوەی غازی شل لە کێڵگەی کۆرمۆرەوە بە تانکەر بۆ شارەکانی هەرێمی کوردستان دەستی پێکردەوە.

 

چۆمان مەحموود، پەیامنێری ئاڤا میدیا لە سلێمانی، گوتی: وەک تاقیکردنەوە یەکەم کاروانی هەناردەکردنەوەی غازی شل، هەشت تانکەری غازی شل لە کێڵگەی کۆرمۆرەوە ڕەوانەی شارەکانی هەرێمی کوردستان کران.

 

ئەمەش بزانە: غازی شل (LPG) ئەو غازەیە بۆ غازی ماڵان و ئۆتۆمبێک و کارگەکان بەکاردێت.

 

بۆچی گرنگە: هەناردەکردنەوەی غازی شل لە لە کێڵگەی کۆرمۆرەوە، وادەکات بڕی غازی شل لە شارەکانی هەرێمی کوردستان کەم نەبێتەوە و نرخەکەشی گران نەبێت.

 

باکگراوند: ڕۆژی پێنج شەممە، 27-11-2025، کەمال محەممەد، وەزیری سامانە سروشتییەكانی هەرێمی كوردستان بەوەكالەت گوتی، بۆ هەفتەیەك غازی ماڵانمان هەیە، بۆیە تەقینەوەی كێڵگەی كۆرمۆر و وەستانی ناردنی غاز لە كێڵگەكەوە، هیچ كاریگەرییەكی لەسەر كەم بوونەوەی غازی ماڵان نابێت و گران نابێت، داواشمان لە وەزیری نەوتی عێراق کردووە، لەم دۆخە هاوکارمان بن، ئەوان بەڵێنیانداوە بە زوویی غاز بۆ هەرێمی کوردستان بنێرن و ئەمەش یارمەتیدەر دەبێت بۆ ئەوەی کێشەی کەمی غاز دروست نەبێت.