بەسێ هۆزات: ئەندامانی پەکەکە هیچ تاوانیان نەکردووە تا پێویستییان بە بڕیاری لێبوردن هەبێت

ئاڤا نیوز 

بەسێ هۆزات، هاوسەرۆکی گشتیی کەجەکە ئاماژە بەوە دەدات کە سەرکردایەتی و ئەندامانی پەکەکە نایانەوێت تورکیا بڕیاری لێبووردن و گەڕانەوە بۆ ماڵیان بۆ دەربکرێت و دەڵێت: بڕیاری لێبوردن بۆ کەسێک دەردەچێت کە تاوانی کردبێت، ئێمە هیچ تاوانێکمان نەکردووە.

لێدوانی فەرمی: بەسێ هۆزات لە میانی هەڤپەیڤینێک لەگەڵ میدیا خەبەر سەرنج دەخاتە سەر ئەوەی گەیشتوونەتە قۆناغی دووەمی پرۆسەی ئاشتی و ئەویش خۆی دەبینێتەوە لە ڕەخساندنی زەمینەسازیی یاسایی بۆ پرۆسەکە، دەرکردنی ژمارەیەک یاسا بۆ فراوانکردنی پانتاییی ئازادی لە تورکیا و باکووری کوردستان و تێکەڵبوونی دیموکراتییانە.

بە تەنیشت ئەم بابەتەوە: هۆزات سەرنج دەخاتە سەر ئەوەی دوای دەرکردنی ئەم یاسایانە، ئەندامانی پەکەکە دەتوانن دوای گەڕانەوە بۆ تورکیا و باکووری کوردستان بەشداری لە سیاسەتی دیموکرات و کۆمەڵگای دیموکراتدا بکەن و دەڵێت: ئەو ئەندامانەمان چاویان لە ژیانی تایبەتی خۆیان و چوونەوە لای کەسوکاریان نییە، بەڵکوو ژیانی خۆیان بۆ خەبات لەپێناو داکۆکیکردن لە مافەکانی گەلەکەیان داناوە. 

ئەوەی پێویستە بیزانیت: بەسێ هۆزات چوونی شاندێکی سێ کەسی کۆمیسیۆنە پەرلەمانییەکەی تورکیا بۆ لای عەبدوڵڵا ئۆجەلان بە گرنگ و ئەرێنی دەزانێت و دەڵێت: بەڵام ئەمە بە هەنگاوێکی زۆر بەهێز نازانین بۆ سەرخستنی پرۆسەی ئاشتی. پێویستە ئاک پارتیی دەسەڵاتدار چیتر بە دوودڵی مامەڵەکە لەگەڵ پرۆسەکە نەکات و هەنگاوی بوێرانە بنێت.