کارەکانی سایلۆی هەڵەبجە 80%ـی تەواو بووە

ئاڤا نیوز

كارەكانی سایلۆی هەڵەبجە 80%ـی تەواو بووە، سەرپەرشتیاری پرۆژەكەش ئاشكرای دەكات، ساڵی داهاتوو كارەكانی تەواو دەبێت كە توانای هەڵگرتنی 40 هەزار تۆن دانەوێڵەی هەیە.

چیرۆكی سەرەكی: لەچوارچێوەی بایەخدانی كابینەی نۆیەمی حكومەتی هەرێمی كوردستان بە بەهێزكردنی ژێرخانی ئابووریی هەرێمی كوردستان و بەرەوپێشبردنی كەرتی كشتوكاڵ و ساغكردنەوەی بەرهەمی جووتیارانی كورد، ژمارەیەك سایلۆی نوێ لە هەرێمی كوردستان دروستكراون، سایلۆی هەڵەبجەش یەکێکە لە پرۆژە ستراتیژی و گرنگەکانی کابینەی نۆیەم کە لەلایەن وەزارەتی بازرگانی و پیشەسازیی حکومەتی هەرێمی كوردستانەوە لە سنووری پارێزگای هەڵەبجە دروست دەکرێت.

لێدوانی فەرمی: کاوە حیکمەت، سەرپەرشتیاری پرۆژەی سایلۆی هەڵەبجە لەبارەی پرۆژەكەوە ڕایگه‌یاند: "سایلۆی هەڵەبجە لە ئێستادا قۆناغێکی باشی لە کارەکانی بڕیوە و 80%ی کارەکانی تەواو بووە؛ بۆ ساڵی داهاتوو کارەکانی تەواو دەبێت".

ئەوەی پێویستە بیزانیت: تێچووی دروستکردنی سایلۆی هەڵەبجە، 27 ملیار و 500 ملیۆن دینارە، توانای هەڵگرتنی 40 هەزار تۆن دانەوێڵەی هەیە؛ لەگەڵ 10 کۆگەی عەمبارکردنی خۆراک، کە قەبارەی هەریەکەیان 1200 مەتر دووجایە.

بۆچی گرنگە: بە تەواوبوونی سایلۆکەش جوتیارانی هەڵەبجە و ناوچەکانی دەوروبەری، وەک گەرمیان و شارەزوور و چەندین ناوچەی تر دەتوانن سوودی زۆری لێ وەربگرن بۆ دانەوێڵەکانیان.