بۆ یەکەمجار بەرپرسێکی ڕۆژئاوای کوردستان بانگهێشتی تورکیا دەکرێت

ئاڤا نیوز

بۆیەکەمجار بەرپرسی پەیوەندییەکانی دەرەوەی ئیدارەی ڕۆژئاوای کوردستان بانگهێشتی کۆنفرانسی نێودەوڵەتی "ئاشتی و کۆمەڵگەی دیموکراسی" دەکرێت کە بڕیارە ڕۆژانی 6 و 7ی مانگی داهاتوو لە ئیستەنبووڵ بەڕێوەبچێت.

وێنە گەورەکە: کۆنفرانسی نێودەوڵەتی "ئاشتی و کۆمەڵگەی دیموکراسی" لەلایەن پارتی یەکسانی و دیموکراسیی گەلان - دەم پارتییەوە ڕێکخراوە و تیایدا چەندین کەسایەتی لە ناوخۆی تورکیا، هەرێمی کوردستان و وڵاتانی جیهانەوە بانگهێشتکراون، لە کۆنفرانسەکەدا هەنگاوەکانی ئێستا و داهاتوویی پرۆسەی ئاشتی و چارەسەری پرسی کورد لە تورکیا و باکووری کوردستان گفتوگۆی لەسەر دەکرێت، لە کۆتاییشدا کۆنفرانس ڕاسپاردەی خۆی لەبارەی پرۆسەکە بڵاودەکاتەوە.

لێدوانی فەرمی: تەیب تەمەل، جێگری هاوسەرۆکی دەم پارتی ئەمڕۆ شەممە بە "ئاژانسی وڵات"-ی باکووری کوردستانی ڕاگەیاند، لەناو ئەوانەی بانگهێشتی کۆنفرانسەکە کراون، ئیلهام ئەحمەد، بەرپرسی پەیوەندییەکانی دەرەوەی ئیدارەی خۆسەری ڕۆژئاوای کوردستان هەیە و ئێستا هەوڵەکان لەگەڵ بەرپرسانی حکومەتی تورکیا بۆ ئامادەبوونی ناوبراو چڕکراونەتەوە، ئەگەریش ڕێوشوێنی یاسایی بۆ ئامادەبوونی نەبوو، پەیامی ناوبراو بۆ کۆنفرانسەکە دەخرێتەڕوو و بەشێوەی پەیامی ڤیدیۆیی بەشداردەبێت.

باکگراوند: تشرینی یەکەمی ساڵی ڕابردوو لە تورکیا پرۆسەیەکی نوێی چارەسەری پرسی کورد دەستیپێکرد، لە کۆتا هەنگاوی پرۆسەکەشدا 24ی ئەم مانگە شاندێکی کۆمیسیۆنی تایبەت بە پرۆسەی چارەسەری لە پەرلەمانی تورکیا، سەردانی عەبدوڵڵا ئۆجەلان، رێبەری زیندانیکراوی پەکەکەیان لە زیندانی ئیمراڵی کرد، بڕیاریشە لە قۆناغی داهاتوودا هەنگاوی یاسایی بۆ چارەسەری پرسی کورد لە پەرلەمانی تورکیاوە بنرێت.