وەزارەتی کارەبا: لە ماوەی 24 کاتژمێری داهاتوو دۆخی کارەبا ئاسایی دەبێتەوە

ئاڤا نیوز

وەزارەتی کارەبای حکومەتی هەرێمی کوردستان دڵنیایی دەدات لە ماوەی 24 کاتژمێری داهاتوودا دۆخی کارەبا بە تەواوی ئاسایی دەبێتەوە.

وێنە گەورەکە: بە هۆی ‌هێرشی مووشەکی بۆ سەر کێڵگەی غازی کۆرمۆر لە ڕۆژی چوارشەممەوە هاووڵاتییانی هەرێمی کوردستان بێ بەشبوون لە کارەبای 24 کاتژمێر، هەوڵەکانی حکومەتی هەرێمی کوردستانیش بۆ چارەسەرکردنی ئەو دۆخە بەردەوامە.

ڕاگەیێنراوی فەرمی: ئەمڕۆ یەکشەممە 30-11-2025، وەزارەتی کارەبای حکومەتی هەرێمی کوردستان ڕایگەیاند: کاتژمێر 02:00ی بەرەبەیانی ئەمڕۆ گاز لە کێڵگەی کۆرومۆر بۆ وێستگەکانی بەرهەمهێنانی کارەبا گواسترایەوە.

هەر بەگوێرەی ڕاگەیێنراوەکە، وێستگەکانی کارەبا دەخرێنەوە کار و دۆخی کارەبا بەرەو باشبوون دەچێت، هەروەها لە ماوەی 24 کاتژمێری داهاتوودا دۆخەکە بەتەواوی ئاسایی دەبێتەوە.

لەلایەکی دیکەوە: شەوی ڕابردوو ئاڤا وەکو یەکەم میدیا ئاشکرای کرد، کە دۆخی کارەبا بەرەو ئاسایی بوونەوە دەچێت و دووبارە کارەبای 24 کاتژمێری بۆ هەرێمی کوردستان دابیندەکرێتەوە.