ئاڤای خەڵک: نزیکەی 12 ساڵە قوتابخانەیەک لە نێوان دوو گەڕەکی هەولێر تەواونەکراوە

ئاڤا نیوز

نزیکە 12 ساڵە قوتابخانەیەکی تەواونەکراو لە نێوان دوو گەڕەکی هەولێر بە هۆی قەیرانی داراییەوە جێهڵدراوە، قوتابییانی ئەو ناوچەیەش لەناو کابینە دەخوێنن.

چیرۆکی سەرەکی: قوتابخانەکە لەنێوان گەڕەکی هەشتی حەسارۆکان و بێرکۆتی نوێی هەولێرە، بە هۆی تەواونەکردنی لەلایەن بەڵێندەرەوە ئیستا بۆتە شوێنی بەخێوکردنی مەڕو بزن. 

بەدواداچوونی ئاڤا: ئەو قوتابخانەیە ئێستا بووەتە شوێنی مانەوەی چەند خێزانێک و بەخێوکردنی مەڕ و بزن، ئەمەش لەکاتێکدایە کە قوتابییانی ئەو دوو گەڕەکە لە کابینە دەخوێنن. 

لێدوانی فەرمی: لوقمان سەعید، بەڕێوەبەری گشتیی پەروەردەی هەولێر دەڵێت: بەمنزیکانە بە هەماهەنگی پارێزگای هەولێر و وەزارەتی پەروەردە لەپلانماندایە بە لیستێک ناوی سەرجەم ئەو قوتابخانانەی لە سنوری پارێزگای هەولێر تەواو نەکراون بە هۆی نەبوونی بودجە و قەیرانی دارایی کۆبکەینەوە، بۆ ئەوەی بەزووترین کات هەوڵی تەواوکردنیان بدرێت و چارەسەرێکیان بۆ بدۆزرێتەوە.

لەلایەکی دیکەوە: ئالان حەمە سەعید، وەزیری پەروەردەش باسی لەوەکرد: وەزارەتی پەروەردە بەرپرسیارەتی هیچ قوتابخانەیەکی تەواونەکراو هەڵناگرێت تاوەکو بە تەواوکراوی تەسلیمی وەزارەت نەکرێت، ئەوەشی لە قوتابخانە تەواونەکراوەکان ڕوودەدات بەڵێندەر لێی بەرپرسە، بەڵام هەموو هەوڵێک دەدەین قوتابخانە تەواونەکراوەکان تەواو بکەین کە بەهۆی نەبوونی بوودجە کارەکانیان وەستاوە.