وتەبێژی وەزارەتی کارەبا: هەموو ئەو شوێنانەی کارەبای 24 کاتژمێریان هەبووە دۆخەکە وەک پێشووی لێدێتەوە

ئاڤا نیوز

تیمەکانی بەڕێوەبەرایەتی گشتیی کۆنتڕۆڵی کارەبای هەرێمی کوردستان، لە هەوڵدایە گرفتە تەکنیکییەکان چارەسەر بکات بۆ ئەوەی لەماوەی 24 کاتژمێری داهاتوو دۆخی کارەبا ئاسایی ببێتەوە و کارەبای 24 کاتژمێری بگەڕێتەوە.

وێنە گەورەکە: بە هۆی هێرشی مووشەکی بۆسەر کێڵگەی غازی کۆرمۆر لە ڕۆژی چوارشەممەوە، هاونیشتمانیانی هەرێمی کوردستان ڕووبەڕووی گرفتی کەمی کارەبا بوونەتەوە، حکومەتی هەرێمی کوردستان لە هەوڵدایە بۆ ئاسایی کردنەوەی دۆخەکە.

لێدوانی فەرمی: ئومێد ئەحمەد، وتەبێژی وەزارەتی کارەبا بە ئاڤای گوت، ئەو بڕە کارەبای هەیە بە شێوەیەکی هاوسەنگ و یەکسان بەسەر ناوچەکانی کوردستان دابەشكراوە، ئێستا و دوای دووبارە ناردنەوەی غاز بە گوێرەی پەستان یەکەکان دەخرێنەوە کار بۆ ئەوەی دۆخەکە بگەڕێتەوە پێش ڕووداوە و هاونیشتمانیان سوودمەند بن لە کارەبای 24 کاتژمێری. 

گوتیشی، "بەهۆی ئەوەی ئەمڕۆ مووچە دابەش دەکرێت، هەوڵمان داوە کارەبا لەسەر ئامێرەکانی ڕاکێشانی پارە نەبڕێت و هاووڵاتییان بتوانن بە ئاسانی مووچەکانیان وەربگرن".