لەبارەی گەڕانەوەی کارەبای 24 کاتژمێری دڵنیایی دەدرێت

ئاڤا نیوز

وەزیری کارەبای هەرێمی کوردستان لەبارەی گەڕانەوەی کارەبای 24 کاتژمێری پڕۆژەی ڕووناکی دڵنیایی دەدات و بە ئاڤای ڕاگەیاند: دۆخی پێدانی کارەبا تاوەکو ئێوارەی ئەمڕۆ بە تەواویی ئاسایی دەبێتەوە. 

وێنە گەورەکە: بە هۆی هێرشی مووشەکی بۆسەر کێڵگەی غازی کۆرمۆر لە ڕۆژی چوارشەممەوە، هاونیشتمانیانی هەرێمی کوردستان ڕووبەڕووی گرفتی کەمی کارەبا بوونەتەوە، حکومەتی هەرێمی کوردستان لە هەوڵدایە بۆ ئاسایی کردنەوەی دۆخەکە.

لێدوانی ڕۆژنامەوانی: کەمال محەممەد، وەزیری کارەبا و وەزیری سامانە سروشتییەکان بە وەکالەت لە لێدوانێکی ڕۆژنامەوانیدا بە ئاڤای ڕاگەیاند: تیرۆریستان ویستیان ئەوەبوو کوردستان بخەنە تارکییەوە، بەڵام نەمانهێشت ئەو خەونەیان بێتە دی، ئێستا 76%ی دۆخی کارەبا ئاسایی بووەتەوە و تاوەکو ئێوارەی ئەمڕۆ یەکشەممە دۆخەکە بە تەواویی ئاسایی دەبێتەوە.

وەزیری کارەبای هەرێمی کوردستان لە لێدوانە ڕۆژنامەوانییەکەیدا ئامانەشی گوت:

- ئێستا دوو هەزار مێگاوات کارەبامان هەیە، ڕێژەکە بۆ چوار هەزار و 500 مێگاوات دەچێت.

- سەرۆکوەزیران مەسرور بارزانی لەسەرەتای ڕووداوەکەوە لەسەر هێڵ بوو، بۆ ئەوەی کارەبا بگەڕێتەوە دۆخی ئاسایی.

- ئەو خەزانەی لێی دراوە تاوەکو ئێستا چاک نەکراوەتەوە، بۆیە ئێمە زیاتر لە 150 تانکەر وەکو جێگرەوە بۆ گواستنەوەی سووتەمەنی بەکاردەهێنین تا کاتی چاککردنەوەی خەزانەکە.

- وەزارەتی نەوتی فیدراڵ دوێنێ یەکەم وەجبەی غازی بۆ هەرێمی کوردستان نارد. 

- بۆ پاراستنی ژێرخانی ئابووری کوردستان، پلانمان ئەوەیە سیستمی پاراستن بۆ کێڵگەی کۆرمۆر دابین بکرێت، پێش هەر شتێک ئەمە لە بەرژەوەندی حکومەتی فیدراڵە، بۆیە هیوادارین بگەن بەو بڕوایەی سیستمەکە دابنرێت.

لەلایەکی دیکەوە: لەبارەی هەناردەی نەوتی هەرێمی کوردستان بۆ بازاڕەکانی جیهان، کەمال محەممەد گوتی: تاوەکو ئێستا زیاتر لە 12 ملیۆن و 500  هەزار بەرمیل نەوت لە ڕێگای کۆمپانیای سۆمۆوە هەناردە کراوە.

- نرخی هەر بەرمیلێک نەوتیش لە نێوان 60 بۆ 65 دۆلارە.