دوای شەڕی عەشایەری پارێزگاکە.. سەرۆک ئەرکانی سوپای عێراق دەگاتە میسان

ئاڤا نیوز

دوای شەڕ و گرژییە فراوانەکانی چەند ڕۆژی ڕابردوو لە پارێزگای میسانی باشووری عێراق، ئەمڕۆ سەرۆک ئەرکانی سوپای عێراق سەردانی پارێزگاکەی کرد و بۆ تاوتوێکردنی دوایین پێشهاتە ئەمنییەکان لەگەڵ بەرپرسانی پارێزگاکە کۆبووەوە.

وێنە گەورەکە: لە پارێزگای میسان کێشە و شەڕی عەشایەری بەشێوەیەکی بەرچاو زیادیکردووە، لە چەند ڕۆژی ڕابردووشدا دوو ئەندامی سوپای عێراق لەکاتی جێبەجێکردنی فەرمانی دەستگیرکردنی ئەوانەی لەدەرەوەی یاسا چەکیان هەڵگرتووە و داواکراون، کوژران و ئەوەش کاردانەوەی لە ئاستی عێراق لێکەوتەوە.

ڕاگەیێنراوی فەرمی: سەرۆکایەتی ئەرکانی سوپای عێراق بڵاویکردەوە، ئەمڕۆ یەکشەممە فەریق ڕووکن عەبدولئەمیر ڕەشید یاڕەڵڵا، سەرۆک ئەرکانی سوپای عێراق بۆ چاودێری دۆخی ئەمنیی و دوایین پێشهاتەکانی پارێزگاکە، سەردانی پارێزگای میسانی لە باشووری عێراق کرد.