بەرپرسێکی باڵای پەکەکە: پەکەکە هیچ هەنگاوێکی دیکە بۆ پرۆسەی ئاشتی نانێت

ئاڤا نیوز

بەرپرسێکی باڵای پەکەکە ئاماژە بەوە دەدات، پەکەکە هیچ هەنگاوێکی دیکە نانێت بۆ پرۆسەی ئاشتی و داواش لە تورکیا دەکات عەبدوڵڵا ئۆجەلان ئازاد بکات.

وێنە گەورەکە: هەنگاوەکان بۆ سەرخستنی پرۆسەی ئاشتی بەردەوامن، پەکەکە لە دوای چەکدانان چاوەڕێی هەوڵی کردەیی تورکیا دەکات، یەکەم مەرجیشی ئازادکردنی ئۆجەلانە.

لێدوانی فەرمی: ئامەد ماڵازگیرت، بەرپرسی باڵای پەکەکە بە ئاژانسی فرانس پرێسی ڕاگەیاندووە، وەک بەدەمەوە هاتن بۆ بانگەوازەکەی ئۆجەلان، پەکەکە تەواوی هەنگاوەکانی ناوە و هەنگاوی دیکە نانێن.

ئامەد ماڵازگیرت سەرنجی خستووەتە سەر ئەوەی ئێستا تۆپەکە لە گۆڕەپانی تورکیادایە و دەڵێت: ئێستا دەبێت ئەوان هەنگاو بنێن و پرۆسەکە بەرەوپێش ببەن.

زانیاریی زیاتر: بەگوتەی ئەو بەرپرسە باڵایە، یەکەم داواکاریی ئەوان لە تورکیا ئازادکردنی ئۆجەلانە و دەڵێت: ئەگەر ئۆجەلان ئازاد نەکرێت، پرۆسەکە ناگات بە ئەنجام. تا ئۆجەلان ئازاد نەبێت، ئێمەش ئازاد نابین و هەست بە ئازادی ناکەین.

لەلایەکی دیکەوە: ئامەد ماڵازگیرت داننان بە مافەکانی گەلی کورد بە شێوەیەکی فەرمی و دەستووری لەلایەن تورکیاوە، بە داواکاریی دووەمی پەکەکە ناو دەبات بۆ سەرخستنی پرۆسەی ئاشتی.