وەزارەتی کارەبا: کارەبای 24 کاتژمێری گەڕایەوە دۆخی ئاسایی خۆی

ئاڤا نیوز

دوای چوار ڕۆژ لە هێرشەکەی سەر کێڵگەی کۆرمۆر، دۆخی پێدانی کاتژمێرەکانی کارەبای نیشتیمانی، لە سەرانسەری هەرێمی کوردستان ئاسایی بووەوە، کارەبای 24 کاتژمێریش لە پڕۆژەی ڕووناکی بە تەواوی ئاسایی بووەتەوە.

چیرۆکی سەرەکی:  بەهۆی ئەو هێرشەی کە بەرەبەیانی 27-11-2025 کرایە سەر کێڵگەی غازی کۆرمۆر، بەشێکی کێڵگەکە گڕی گرت و زیانێکی زۆری بە خەزانی غاز گەیاند، بەهۆیەوە هەناردەی غاز بۆ وێستگەکانی کارەبا ڕاگیرا، نزیکەی سێ هەزار مێگاوات ئاستی بەرهەمهێنانی کارەبا لە ڕۆژێکدا دابەزی، بەمەش ڕێژەی پێدانی کاتژمێرەکانی کارەبای نیشتیمانی لە سەرانسەری هەرێمی کوردستان لە 80%ـی کەم بووەوە، هاووڵاتیانیش لە چاوەڕوانی ئاسایی بوونەوەی دۆخی کارەبابوون.

ڕاگەیێنراوی فەرمی: وەزارەتی کارەبای حکومەتی هەرێمی کوردستان ڕایگەیاند، بەخۆشحاڵییەوە پێدانی کاتژمێرەکانی کارەبای نیشتیمانی گەڕاوەتەوە دۆخی ئاسایی خۆی، بەهەمان شێوە کارەبای 24 کاتژمێری لە پڕۆژەی ڕووناکی بەتەواوی ئاسایی بووەتەوە.

زانیاریی زیاتر: لەدوای هێرشەکە، زوو تیمە تەکنیکییەکانی هەردوو وەزارەتی سامانە سرووشتییەکان و کارەبای حکومەتی هەرێمی کوردستان لەگەڵ کۆمپانیای داناغاز، بەشێوەیەکی بەردەوام کاریان کرد بۆ ئەوەی کوژانەوەی گشتی لە سیستەمی کارەبا ڕوونەدات، بتوانن گرفتی ئەو شوێنانەی زیانیان بەرکەوتبوو چارەسەر بکەن و لە کەمترین کات دۆخی کارەبا ئاسایی بکەنەوە.

لێدوانی فەرمی: کەمال محەممەد، وەزیری کارەبای حکومەتی هەرێمی کوردستان ڕایگەیاند، گەڕانەوەی چوار هەزار و 200 مێگاوات کارەبا بۆ ناو تۆڕی کارەبا کارێکی گەورەبوو کە بە هەوڵی تیمەکان بوو، هاوکات بە پێویستییەکی گرنگی زانی سیستەمی بەرگریی ئاسمانی لە کێڵگەی غازی کۆرمۆر دابین بکرێت بۆ پێدانی گرەنتی بە کۆمپانیای داناغاز و دووبارە نەبوونەوەی هێرشەکان.

باکگراوند: کێڵگەی غازی کۆرمۆر، غاز بۆ وێستگەکانی کارەبا لە چەمچەماڵ، بازیان و هەولێر دابین دەکات، کە دەکاتە زیاتر لە 75%ـی کۆی گشتیی بەرهەمهێنانی کارەبای هەرێمی کوردستان، کە سوود بە زیاتر لە شەش ملیۆن کەس دەگەیەنێت.