لە کوردستان ئەمساڵ زیاتر لە 800 مۆڵەتی هاوردەکردنی ئۆتۆمبێل بە بازرگانان دراوە

ئاڤا نیوز

لە ماوەی 11 مانگی ڕابردوودا 844 مۆڵەتی هاوردەکردنی ئۆتۆمبێل بە بازرگانان دراوە، دەیان مۆدێلی جیاوازی ئۆتۆمبێل هێنراونەتە هەرێمی کوردستان.

وێنە گەورەکە: بەهۆی کەمیی جۆری هۆکارەکانی گواستنەوەی وەک میترۆ و شەمەندەفەر، بەشی هەرە زۆری هاونیشتمانیانی هەرێمی کوردستان و عێراق بۆ هاتووچۆکردن بەشێوەیەکی سەرەکی پشت بە ئۆتۆمبێل دەبەستن، بۆیە خواستی بەردەوام لەسەر کڕینی ئۆتۆمبێل هەیە، بەمەش ڕۆژانە دەیان جۆری جیاوازی ئۆتۆمبێل هاوردەی هەرێمی کوردستان دەکرێن.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای وت: ئەمساڵ 167 هەزار و 477 ئۆتۆمبێل هاوردەی هەرێمی کوردستان کراون، 840 مۆڵەتیش بە بازرگانان دراوە.

ئەوەی پێویستە بیزانیت: مەرجە ئۆتۆمبێلەکان بەپێی ڕێنمایی وەزارەتی ناوخۆ و وەزارەتی بازرگانی هەرێمی کوردستان هاوردە بکرێن، ئەو ئۆتۆمبێلانەشی بەکارهاتوون، دەبێت سووتاو، شانسی بڕاوە، لەحیم کراو و ژێرئاو کەوتوو نەبن، هاوکات بەردی ئەگزۆزیان دەرنەهێنرابن.