ئێران: پێشوازی لە چەکدانانی پەکەکە دەکەین

ئاڤا نیوز

تورکیا و ئێران لەسەر ئاستی وەزیرانی دەرەوە لە تارانی پایتەختی ئێران کۆبوونەوە و جەختیان لە بەهێزکردنی پەیوەندییەکانیان کرد.

لێدوانی فەرمی: هاکان فیدان، وەزیری دەرەوەی تورکیا لە تاران ڕایگەیاند، وڵاتەکەی هەوڵ دەدات لە چوارچێوەی یاسا نێودەوڵەتییەکاندا کار بۆ لابردنی سزاکانی سەر ئێران بکات و هەمیشە لە دانوستانە ئەتۆمییەکاندا پشتیوانی لە ئێران کردووە و بە بۆچوونی ئەوان سزاکانی سەر ئێران نادادپەروەرانەن.

لە بەشێکی دیکەی قسەکانیدا وتی، گفتوگۆیان لەسەر بازرگانی، وزە و خۆشگوزەرانیی هەردوولا کردووە. وتیشی، پێویستە ژمارەی دەروازە سنوورییەکان زیاد بکەین و کاراتریان بکەین.

بۆچوونی لایەنی بەرامبەر: عەباس عێراقچی، وەزیری دەرەوەی ئێران ڕایگەیاند، ئامادەین دەروازەی سنووری نوێ لەگەڵ تورکیا بکەینەوە و پێشوازی لە چەکدانانی پەکەک دەکەین.

سەبارەت بە سووریاش وتی، سەقامگیری و خۆشگوزەرانی سووریا بەندە بە پاراستنی یەکپارچەیی خاکەکەی و گەورەترین مەترسیش لە ئیسرائیلەوە دێت.