پەکەکە شەش ئەشکەوتی بە تەواوەتی لە زاپ و مەتینا بۆ تورکیا بەجێهێشتووە

ئاڤا نیوز

دەزگای هەواڵگریی تورکیا و سوپای تورکیا دڵنیابوونەتەوە لەوەی پەکەکە لە ناوچەی زاپ کشاوەتەوە و بە تەواوی چوار ئەشکەوتی لە زاپ و دوو ئەشکەوتی لە مەتینا جێهێشتووە.


چیرۆکی سەرەکی: پەکەکە بۆ ڕێگەگرتن لە ئەگەری پێکدادان لەگەڵ سوپای تورکیا و زیانگەیاندن بە پرۆسەی ئاشتی دوو هەفتە لەمەوبەر کشانەوەی هێزەکانی لە ناوچەی زاپ ڕاگەیاند.

بڵاوکراوەی فەرمی: ڕۆژنامەی تورکیا نزیک لە ئاکپارتیی دەسەڵاتداری تورکیا ئەمڕۆ یەکشەممە بڵاوی کردووەتەوە هەر شەش ئەشکەوتەکە بە تەواوی پشکێنراون، زانیاریی ورد لەبارەی چەک و تەقەمەنییەکان تۆمار دەکرێن و دواتر لەناو دەبرێن. هیچ جۆرە چەکێکی قورسیش لەو ئەشکەوتانەدا نەدۆزراونەتەوە.

بەتەنیشت ئەم بابەتەوە: ڕۆژنامەکە لە زاری سەرچاوە ئەمنییەکانەوە ئاماژەی بەوە داوە ئێستا ئامادەکاری دەکرێت بۆ ئەوەی پەکەکە خواکوڕک، گارە و حەفتانینش جێبهێڵێت و لە ماوەیەکی نزیکدا پێشهاتی هاوشێوە لە شەنگال و مەخموریش ڕوو دەدات.

ئەوەی پێویستە بیزانیت: ڕۆژنامەی تورکیا سەرنجی خستووەتە سەر ئەوەی بەم جۆرە دەرگا بە ڕووی گەڕانەوەی پەنابەرە مەدەنییەکانی کەمپی مەخمور دەکرێتەوە بۆ تورکیا و باکووری کوردستان و ناسنامەیان بۆ دەستەبەر دەکرێت.

لەلایەکی دیکەوە: سەرچاوە ئەمنییەکان باسیان لەوە کردووە لە کاتێکدا پرۆسەی چەکدانانی پەکەکە بەردەوامە، 30%ـی ئەندامەکانی نایانەوێت چەک دابنێن و جێهێشتنی قەندیلیش پەیوەستە بە ڕەخساندنی زەمینەسازیی یاسایی بۆ پرۆسەکە و ڕەوانەکردنی سەرکردەکانی پەکەکە بۆ وڵاتی سێیەم.