باوكی گەنجە كوژراوەكەی لاجان: كوڕەكەم بە گوللەی وێڵ كوژرا

ئاڤا نیوز

باوكی گەنجە كوژراوەكەی گرژییەكانی دوێنێی گوندی لاجان بۆ ئاڤا دەڵێت، "كوڕەكەم بە گوللەی وێڵ كوژراوە و ناتوانم هیچ لایەنێك تۆمەتبار بكەم". داواكارییەكی تایبەتیشی لە ئاڤا و بەتایبەت هەوراز گوڵپی هەیە.

چیرۆكی سەرەكی: شێخ بەهائەددین، باوكی عیرفان، گەنجە كوژراوەكەی ڕووداوەكانی دوێنێی سەر ڕێگەی گوێر-هەولێر، لە كەركووكەوە، یەكەم ڕۆژی پرسەی كوڕەكەی جێهێشت و ڕووی لە كەناڵی ئاڤا و هەوراز گوڵپی كرد.

لێدوانی فەرمی: باوكی عیرفان بە ئاڤای وت، لە كەركووكەوە پرسەی كوڕەكەم جێهێشتووە و ڕووم لە ئاڤا و هەوراز گوڵپی كردووە، چونكە دڵنیام دەنگم دەگەیێنێت و مافم وەردەگرێتەوە.

پێدراوە ڕاستەكان: باوكی عیرفان چیرۆكی ساتەوەختی كوژرانی كوڕەكەی وەك خۆی دەگێڕێتەوە و دەڵێت، "کوڕەکەم نە خەڵکی گوندەکەیە و نە لە عەشیرەتی ناوچەکەیە، بەڵکو سەرقاڵی كار و کاسبی خۆی بووە و شۆفێری بارهەڵگرە و ڕۆژانە بە 15 هەزار دینار باری چەو و لم لە گوێڕەوە دەهێنێتە هەولێر، لەڕێگەدا تووشی ئەو خۆپیشاندەرانە بووە و گەڵابەكەیان پێ ڕاگرتووە، چەند شۆفێریی دیكەش دووچاری هەمان بارودۆخ بوون، كە بووەتە شەڕە تەقە، شەهید عیرفانی كوڕم هەوڵیداوە خۆی دەرباز بكات، دەرگای ئۆتۆمبێلەكەی كردووتەوە و لەناوەڕاستی شەقامەكە گوللەی بەركەوتووە. دووپاتیشی كردەوە، بەوپێیەی هەم هێزە ئەمنییەكان و هەمیش خۆپیشاندەران چەكیان لەلا بووە، نازانم كێ كوڕەكەمی كوشتووە و كوڕەكەم بە گوللەی وێڵ كوژراوە."

ڕوونیشی كردەوە، ئێمە خاوەنی سەرۆك بارزانی و سەرۆكوەزیران مەسرور بارزانین، كە ماف بۆ مافخوراوان و لێقەوماوان دەگەڕێنێتەوە، لەڕێگەی ئاڤاوە داوا دەكەم، خوێنی كوڕەكەم بەفیڕۆ نەچێت.

باوكی عیرفان دەڵێت، بەشێك لە میدیاكان هەوڵیاندا قسە لەسەر زاری ئێمە بڵاوبكەنەوە بە مەرامی سیاسی و بۆ بەرژەوەندی خۆیان، ئێمەش لە ساتەوەختی ڕووداوەكە، دڵ گەرم بووین و بە ڕووداوەكە كاریگەر ببووین، میدیاكان هەوڵیاندا بەشێوەیەكی خراپ و بەرژەوەندیخوازانە، ئەو دۆخەی ئێمە بقۆزنەوە و بەكاربهێنن.

باكگراوند: ئێوارەی دوێنێ شەممە 29ـی تشرینی دووەم، گرژی و ئاڵۆزی لەسەر ڕێگەی گوێڕ- هەولێر لەنزیك گوندی لاجان دروستبوو، كۆمەڵە کەسێک رێگای تانکەرەکانی گواستنەوەی سووتەمەنی و هاووڵاتیانیان لە سنووری گوێڕ گرت و تەقەیان بەسەر خەڵک و ڕێبوارانی ئەو ڕێگایەدا کرد، لەئەنجامی تەقەی ئەو کەسانەدا هاووڵاتییەک بەناوی عیرفان بووە قوربانی و گیانی لە دەستدا و ژمارەیەک کەسی تریش بریندار بوون.