پارەی خزمەتگوزاریی پرۆژەکانی یەکەی نیشتەجێبوون ڕێکدەخرێتەوە

ئاڤا نیوز

پێداچوونەوە بە پارەی خزمەتگوزاری پڕۆژەکانی نیشتەجێبوون، سیتییەكان و شووقەکان دەكرێت، هی بەشێکیان ئەوانەی پارەکە زۆرە کەم دەکرێتەوە.

چیرۆکی سەرەکی: دەستەی وەبەرهێنانی كوردستان بە هاوبەشی لەگەڵ وەزارەتەكانی  شارەوانی و بازرگانی لیژنەیەكی باڵای پێكهێناوە، پێداچوونەوە بە خزمەتگوزاری سیتییەكان دەكەن و نرخەكان كەم دەكەنەوە.

لە كوردستان سەدان پڕۆژەی نیشتەجێبوون هەیە، لە هەر سیتیەک یان پڕۆژەیەکی شووقە كۆمپانیایەك خزمەتگوزارییەكانی دابین دەكات، لەبەرانبەردا مانگانە پارە لە دانیشتووانەکەی وەردەگیرێت.

لێدوانی فەرمی: بەرگەشت ئاكرەیی، وتەبێژی دەستەی وەبەرهێنان بە ئاڤای وت: ماوەیەکە لیژنەکە دەستبەکار بووە لە هەولێر و سلێمانی دهۆک و ناوچەکانی تریش، پێداچوونەوە بە خزمەتگوزاری سیتییەكاندا دەكەن لەگەڵ نرخەکەی، بەمزووانە بڕیاری كۆتایی دەدەن.

هەڵسەنگاندنی لیژنەكە لەسەر چۆنییەتی خزمەتگوزاریی كۆمپانیاكانە، بە چەند پێوەرێک پارەی خزمەتگوزاری دیاری دەکەن:

٠ شوێن و کواڵیتی و بەهای خانوو یان شووقەکە.
٠ ئەو خزمەتگوزارییەی پێشكەشی دەكەن، تا چەند زۆر و باش و بێ کێشەن.

لەسەر ئەم بنەمایانە پارە دیاری دەکەن، لە هەندێک شوێن پارەکە کەم دەکرێتەوە، هی ئەو پڕۆژانەیشی ئەو پارەیەی وەردەگیرێت کەم بێت زیاد دەکرێت.

ئەوەی پێویستە بیزانیت: دەستەی وەبەرهێنان هۆشداری دەدات هەر پڕۆژەیەک بە بڕیارەکە پابەند نەبێت سزای دەدەن.