کارەبای عێراق: بەگەڕخستنەوەی کێڵگەی کۆرمۆر 700 مێگاوات کارەبای بۆ دابین کردووین

ئاڤا نیوز

وەزارەتی کارەبای عێراق ئاشکرای کرد، لە دوای دەستپێکردنەوەی کارەکانی کێڵگەی کۆرمۆر دوای هێرشەکە، توانیانە 700 مێگاوات کارەبای نیشتمانی لە کێڵگەوەکە وەربگرن، هاوکات ئەوەشی ئاشکرای کرد، دەستکراوە بە دەستپێکردنەوەی هاوردەکردنی غازی ئێران.

ڕاگەیێنراوی فەرمی: وەزارەتی کارەبا ڕایگەیاند: چاککردنەوەی زیانەکانی کێڵگەی غازی کۆرمۆر و دەستپێکردنەوەی کارەکانی بەشداربووە لە دابینکردنی 700 مێگاوات بۆ تۆڕی کارەبای نیشتمانی کە لە ئێستادا لە وێستگەکانی کارەبای وەبەرهێنان لە هەرێمی کوردستان کڕدراوە.

ئاماژەی بەوەشکرد، هەماهەنگییەکی نزیک لەگەڵ وەزارەتی کارەبای هەرێمی کوردستان هەیە بۆ گەڕاندنەوەی گرێبەستەکانی کڕینی کارەبا وەک پێشتر.

لەلایەکی دیکەوە: وەزارەتەکە ئەوەشی خستووەتەڕوو، هاوردەکردنەوەی غازی ئێران بەڕێژەی پێنج ملیۆن مەتر سێجا لە ڕۆژێکدا دەستیپێکردووەتەوە، ئەوەش دوای تەواوبوونی کارەکانی چاککردنەوە و یەکەکانی بەرهەمهێنانی کارەبای وێستگەی بەسمایە و مەنسوورییەی نۆژەنکردووەتەوە کە بەهۆی کەمی غازەوە کاریگەرییان لەسەر بووە.

ئەوەی پێویستە بیزانیت: بەگوێرەی وەزارەتی کارەبای عێراق، وەزارەتەکەیان بەهۆی هێرشەکەی سەر کێڵگەی کۆرمۆر هەزار و 200 مێگاوات کارەبای لەدەستداوە، کە دەدرا بە پارێزگاکانی نەینەوا، کەرکووک و سەڵاحەددین.