چەند ڕۆژێکی دیکە ئەنجامی لێکۆڵینەوە لە هێرشەکەی سەر کۆرمۆر ئاشکرا دەکرێت

ئاڤا نیوز

وەزارەتی ناوخۆی عێراق ئاشکرای کرد، لیژنەی بەدواداچوون بۆ بەئامانجکردنی کێڵگەی کۆرمۆر لە سلێمانی ئەرکەکانی تەواوکردووە و چەند ڕۆژێکی دیکە ئەنجامەکانی ئاشکرا دەکرێن.

چیرۆکی سەرەکی: شەوی چوارشەممەی ڕابردوو هێرشکرایە سەر کێڵگەی غازی کۆرمۆر لە سنووری قەزای چەمچەماڵ و لە ئەنجامدا ئاگرێکی گەورە لە کۆگایەکی غاز کەوتەوە و 80%ـی کارەبای هەرێمی کوردستان بەهۆیەوە پچڕا و دواتر لیژنەیەکی لێکۆڵێنەوە بە بڕیاری سەرۆکوەزیرانی عێراق پێکهێنراوە.

لێدوانی فەرمی: میقداد میری، بەڕێوەبەری پەیوەندییەکان و ڕاگەیاندن لە وەزارەتی ناوخۆی عێراق ئاشکرای کردووە، لیژنەی بەدواداچوون بۆ ڕووداوی کێڵگە نەوتییەکانی کۆرمۆر سەردانی کێڵگەکەیان کردووە و فەرماندەی گشتیی هێزە چەکدارەکان لە نزیکەوە چاودێری ئەدای لیژنەکە و کارەکانی دەکات. لیژنەکە ئەرکی خۆی تەواوکردووە، ئەنجامی لێکۆڵینەوەکان هەرکات پەسەندکران ڕادەگەیەنرێت".

ناوبراو وتیشی، "لە چەند ڕۆژی داهاتوودا ئەنجامی لێکۆڵینەوەکان بڵاو دەکرێتەوە، هەر لێدوانێک لەم کاتەدا درابێت نادروستە".

گۆشەیەکی دیکەی دیمەنەکە: میری تۆمەتبارکردنی لایەنێکی دیاریکراو ڕەتدەکاتەوە دووپاتی کردەوە،  تۆمەتبارکردن یان ئاماژەدان بە کەس و لایەنێک سەبارەت بە ڕووداوەکە لە ئێستادا دروست نییە، تا ئەو کاتەی ڕاپۆرتی لیژنەی لێکۆڵینەوەیە دەرچوو و تۆمەتبار ئاشکرا دەبێت.