مەترسی لەسەر دابەشکردنی دوو بەشەخۆراکی ئەمساڵ هەیە

ئاڤا نیوز

ئەمساڵ مەترسی لەسەر دابەشکردنی دوو بەشەخۆراک هەیە، مەترسییەکە سەرتاسەرییە و هەموو عێراق دەگرێتەوە.

وێنە گەورەکە: دابەشكردنی بەشە ئارد و بەشەخۆراکی مانگانەی هەرێمی کوردستان و عێراق لە یەک ئاستدایە، ساڵانی ڕابردوو هاووڵاتیان 10 بەشە خۆراکیان پێدەدرا، بەڵام ئەمساڵ تا ئێستا تەنیا حەوت بەشە خۆراک دابەش کراوە و کار لەسەر دابەشکردنی هەشتەم دەکرێت.

لێدوانی فەرمی: دلێر عەبدولواحید، بەڕێوەبەری بازرگانیی کەلوپەلی خۆراکی هەولێر؛ بە ئاڤای گوت، "بەشە خۆراکی هەشتەم لە کۆگاکانە چاوەڕێی بڕیارین بۆ ئەوەی دەست بەدابەشکردنی بەسەر بریکارەکانی خۆراک بکەین، تا ئێستا ڕوون نییە کە ئەو دوو بەشە خۆراکەی دەمێنێت دابەش دەکرێت، یان ئەمساڵ تەنیا هەشت بەشەخۆراک بە هاووڵاتیان دەدرێت."

دلێر عەبدولواحید ئەوەشی گوت، پێنەدانی ئەو دوو بەشەخۆراکە سەرتاسەرییە و تەنیا پەیوەست نییە بە هەرێمی کوردستانەوە.

لەلایەکی دیکەوە: پسوولەی خۆراک بە ئەلیکترۆنی کراوە ئەو خێزانانەی کە تاوەکو ئێستا پسوولەی خۆراکیان بە ئەلیکترۆنی نەکردووە، یان درەنگ ناوی خۆیان تۆمارکردووە لە بەشەخۆراک و بەشە ئاردی مانگانە بێبەش دەبن، تاوەکو ناویان دەچێتە نێو سیستمەکە و ناویان لە لیستی نوێی مانگانە تۆماردەکرێت.