کۆمیسیۆن وادەی ناردنی ئەنجامەکانی هەڵبژاردنی بۆ دادگای فیدراڵی ئاشکرا کرد

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ڕایدەگەیێنێت، ڕێکارەکانی تایبەت بە هەموو تانەدانەکانی سەر ئەنجامەکانی هەڵبژاردنی تەواو کردووە و ناردوویەتی بۆ دەستەی دادوەری، هەروەها وادەی ناردنی ئەنجامەکانی بۆ دادگای فیدراڵی دیاریکرد بۆ پەسەندکردنیان.

وێنە گەورەکە: نزیکەی سێ هەفتە بەسەر ئەنجامدانی هەڵبژاردنەکانی ئەنجوومەنی نوێنەرانی عێراق تێپەڕ دەبێت، ئەگەرچی ژمارەیەکی زۆری تانە لە ئەنجامەکان تۆمارکراون، بەڵام هێشتا ئەو تانانە هیچیان لە دۆخی دەنگ و کورسییەکان نەگۆڕیووە.

لێدوانی فەرمی: عماد جەمیل، سەرۆکی تیمی ڕاگەیاندنی کۆمیسیۆن، بە ئاژانسی هەواڵی فەرمیی ڕاگەیاند، "ناردنی تەواوی ئەنجامەکانی هەڵبژاردن بۆ دادگای فیدراڵی بۆ پەسەندکردن، دوای ئەوە دەکرێت کە دەسەڵاتی دادوەری هەموو تانەکان کۆتایی پێبهێنیت".

عیماد جەمیل گوتیشی، کۆمیسیۆن هەموو تانەکانی تەواو کردووە و ڕاسپاردەکانی لەبارەیانەوە پێشکەش کردووە. ئێستا کارەکە لای دەستەی دادوەرییە، کە ناتوانرێت بە ماوەیەکی دیاریکراو (10 ڕۆژ) سنووردار بکرێت، چونکە هەندێک لە تانەکان ڕێکاری تەکنیکی یان یاساییان تێدایە کە پێویستییان بە گەڕاندنەوە هەیە بۆ کۆمیسیۆن بۆ پرسیارکردن یان تەواوکردنی ڕێکارە تەکنیکییە پێویستەکان.

دەستەی دادوەری دوای وەرگرتنی دوایین تانە لە کۆمیسیۆن و تەواوکردنی ڕێکارەکانی، پابەندی ماوەی یاسایی دەبێت کە 10 ڕۆژە.

ئەوەی پێویستە بیزانیت: ڕۆژی 27ـی 11ـی 2025، کۆمیسیۆنی باڵای سەربەخۆی هەڵبژاردنەکان ڕایگەیاندبوو، سەرجەم تانەکانیان لە ئەنجامی هەڵبژاردنەکان ڕەوانەی دەسەڵاتی دادوەری کردووە. بەم پێیە بێت دەبێت حەوت یان هەشتی ئەم مانگە ئەنجامەکان بۆ دادگای فیدراڵی بنێردرێت بۆ پەسەندکردن.

بەتەنیشت ئەو بابەتەوە: دوێنی یەکشەممە 30ـی 11، ئەنجوومەنی باڵای دادوەری، یەکلاکردنەوەی 428 تانەی لە کۆی 853 تانە لە ئەنجامەکانی هەڵبژاردنی پەرلەمان ڕاگەیاند.