هاکان فیدان: پووتین ئامادەیە بۆ ئاشتی و کۆتاییهێنان بە جەنگ لەگەڵ ئۆکرانیا بگاتە ڕێککەوتن

ئاڤا نیوز

وەزیری دەرەوەی تورکیا ئاماژە بەوە دەدات ڤلادیمێر پووتین، سەرۆکی ڕووسیا ئامادەیە لە هەلومەرجێکی دیاریکراودا ئاگربەست لەگەڵ ئۆکرانیا ڕابگەیەنێت و کۆتایی بە جەنگ بهێنێت، ئەم پەیامەشیان بە ئۆکرانیا گەیاندووە.

وێنە گەورەکە: هەوڵە نێودەوڵەتییەکان بۆ کۆتاییهێنان بە جەنگی نێوان ڕووسیا و ئۆکرانیا بەردەوامن، بۆ ئەم مەبەستەش ترەمپ پلانێکی 28 خاڵی ئاشتی ئامادە کردووە و داوا لە هەردوولا دەکات پابەند بێن پێیەوە.

لێدوانی فەرمی: هاکان فیدان، وەزیری دەرەوەی تورکیا لە بەرلین'ـی پایتەختی ئەڵمانیا بۆ میدیاکاران دوا و وتی، ڕووسیا و ئۆکرانیا بە هۆی ئەم جەنگەی چوار ساڵە لە نێوانیان هەڵگیرساوە زیانێکی زۆریان بەرکەوتووە، لە هەموو کاتێک زیاتر ئامادەن بۆ کۆتاییهێنان بەو جەنگە و وەدیهێنانی ئاشتی.

بەتەنیشت ئەم بابەتەوە: هاکان فیدان سەرنجی خستەسەر ئەوەی ئەوان وەک تورکیا هەموو هەوڵێک دەدەن بۆ ئەم مەبەستە و ئەم جەنگە زیانێکی زۆری ماددی بە ڕووسیاش گەیاندووە.