ناوەندێکی توێژینەوە: ئەگەر هەیە مەزڵووم عەبدی سەردانی تورکیا بکات

ئاڤا نیوز

سەرۆکی ناوەندێکی توێژینەوە دەڵێت، ئەگەر هەیە مانگی داهاتوو مەزڵووم عەبدی، فەرماندەی هێزەکانی سووریای دیموکرات و ئیلهام ئەحمەد، بەرپرسی پەیوەندییەکانی دەرەوەی ئیدارەی خۆسەری ڕۆژئاوای کوردستان سەردانی تورکیا بکەن.

ڕاگەیێنراوی فەرمی: عەبدولڕەحیم سەماوی سەرۆکی ناوەندی "تەمەل" بۆ توێژینەوە دەڵێت: لە میانی سەردانەکە مەزڵووم عەبدی و ئیلهام ئەحمەد لەگەڵ ئۆجەلان کۆدەبنەوە و ڕێککەوتنێکی نوێ واژۆ دەکەن، ئەمەش درێژەپێدەری ڕێککەوتنی نێوان مەزڵووم عەبدی و ئەحمەد شەرع، سەرۆکی سووریا دەبێت.

زانیاریی زیاتر: پێشتر، تەیب تەمەل، جێگری هاوسەرۆکی دەم پارتی ئاشکرای کردبوو، ئیلهام ئەحمەد، بەرپرسی پەیوەندییەکانی دەرەوەی ئیدارەی خۆسەری ڕۆژئاوای کوردستان بانگهێشتی کۆنفرانسی "ئاشتی و کۆمەڵگەی دیموکراسی" کراوە.

ئەوەی پێویستە بیزانیت: کۆنفرانسی نێودەوڵەتی "ئاشتی و کۆمەڵگەی دیموکراسی" لەلایەن پارتی یەکسانی و دیموکراسیی گەلان (دەم پارتی) ڕێکخراوە و تێیدا چەندین کەسایەتی لە ناوخۆی تورکیا، هەرێمی کوردستان و وڵاتانی جیهانەوە بانگهێشتکراون، لە کۆنفرانسەکەدا هەنگاوەکانی ئێستا و داهاتوویی پرۆسەی ئاشتی و چارەسەری پرسی کورد لە تورکیا و باکووری کوردستان گفتوگۆی لەسەر دەکرێت.