ژمارەیەک پرۆژە لە کەرتی باغلومنارەی هەولێر جێبەجێ دەکرێن

ئاڤا نیوز

ژمارەیەک پرۆژەی خزمەتگوزاریی بە نزیکەی 60 ملیار دینار لە گەڕەكی باغلومنارەی هەولێر جێبەجێ دەکرێن.

وێنە گەورەکە: لە چوارچێوەی هەڵمەتی فراوانکردنی تۆڕی ڕێگاوبان و ژێرخانی هەولێر، سەرۆکایەتیی شارەوانیی هەولێر دەستی بە جێبەجێکردنی پرۆژەیەکی ستراتیژیی نوێ کردووە کە خۆی لە ڕاکێشانی تۆڕی ئاو و ئاوەڕۆ، چەند شەقامێکی سەرەکی و ناوخۆیی گەڕەکی باغلومنارە و چەند پرۆژەیەکی دیکە دەبینێتەوە.

لێدوانی فەرمی: کارزان عەبدولهادی، سەرۆکی شارەوانیی هەولێر بە ئاڤا میدیای ڕاگەیاند، پرۆژەی گەیاندنی خزمەتگوزاریی بۆ گەڕەکی باغلومنارە بە ڕووبەری یەک ملیۆن و 420 هەزار مەتر دووجا و بە گوژمەی 59 ملیار دینار جێبەجێ دەکرێت.

وردەکاریی پرۆژەکە بەمشێوەیە:

- دروستکردنی دوو شەقامی 60 مەتریی سەرەکی کە درێژی هەردووکیان دەگاتە 12 کیلۆمەتر.

- دروستکردنی ژمارەیەک شەقامی ناوخۆیی.

- ڕاکێشانی تۆڕی ئاو.

- دروستکردنی ئاوەڕۆی سندووقی و لوولەیی لە نزیک کەندی تووڕەق بە درێژیی 120 مەتر.

هەر پێنج زۆنەکە بەمشێوەیە دابەش بوون:

زۆنەکانی یەک و دوو و سێ دەکەونە نزیک شەقامی 120 مەتری و بە درێژایی ئەو شەقامە جێگیرن. زۆنی چوار کەمێک دوورترە، بەڵام زۆنی پێنج دەکەوێتە بەشی خوارەوەی مامزاوا و نزیکە لە مەخموور.

ئەوەی پێویستە بیزانیت: شەقامی یەکەم تەواوکاریی ئەو شەقامە 60 مەترییەیە کە لە نەخۆشخانەی فریاکەوتنی ڕۆژئاوا دەستپێدەکات و بەناو گەڕەکی باغلومنارەدا تێدەپەڕێت و دەگاتە شەقامی 150 مەتری و لەوێ یەک دەگرنەوە.

- شەقامی دووەم بە یەکێک لە گرنگترین بەشەکانی پرۆژەکە دادەنرێت و ڕێگەی مووسڵ بە ڕێگەی مەخموور دەبەستێتەوە، ئەم شەقامە لە نزیک تووڕەق و پێش گەیشتنی بە یەکتربڕی ڕێگەی گوێڕ دەستپێدەکات تا دەگاتە سەر ڕێگەی مەخموور.

زانیاریی زیاتر: بە تەواوبوونی ئەو پرۆژانە، نزیکەی شەش هەزار پارچە زەوی سوودمەند دەبن و خزمەتگوزارییان پێدەگات. هەروەها بە تەواوبوونی هەردوو شەقامە 60 مەترییەکە، ئاسنکارییەکی تەواوی هاتووچۆ بۆ دانیشتووانی ئەو بەشەی شاری هەولێر دروست دەکات.

ئەمەش بزانە: پرۆژەکە لەلایەن کۆمپانیای "ڕەیس دیڤلۆپمێنت" جێبەجێ دەکرێت و لەلایەن تیمێکی ئەندازیاریی بەرفراوان کە پێکهاتوون لە ئەندازیارانی سەرۆکایەتیی شارەوانی هەولێر و شارەوانی شەش سەرپەرشتی دەکرێن.

بۆچی گرنگە: ئەم پرۆژەیە هەنگاوێکی گرنگە بۆ کەمکردنەوەی جەنجاڵی لەسەر شەقامە سەرەکییەکانی هەولێر و بووژاندنەوەی ناوچەکانی باشوور و ڕۆژئاوای هەولێر.