ئەنجوومەنی ئاسایشی نێودەوڵەتی لەسەر دۆخی عێراق کۆدەبێتەوە

ئاڤا نیوز

بڕیارە سبەی سێشەممە ئەنجوومەنی ئاسایشی نێودەوڵەتی لەبارەی دۆخی عێراق کۆببێتەوە و نوێنەری تایبەتی سکرتێری گشتیی نەتەوەیەکگرتووەکانیش لە عێراق، ڕاپۆرتێک پێشکەش دەکات.

وێنە گەورەکە:  لە ساڵی 2003 لەسەر داوای عێراق بە بڕیاری ئەنجوومەنی ئاسایشی نێودەوڵەتی، نێردەی نەتەوە یەکگرتووەکان بۆ هاریکاریی عێراق دامەزرا، کاری ئەم نێردەیە یارمەتیدان و ڕاوێژکاری حکومەتی عێراقە، لە 8-5-2024، سەرۆکوەزیرانی عێراق لە نامەیەکیدا بۆ سکرتێرى گشتیی نەتەوە یەکگرتووەکان، داوای کرد تا کۆتایی ساڵی 2025 ئەرکەکانی یونامی لە عێراق کۆتایی پێ بهێنرێت، ڕۆژی 31-5-2025 ئەنجوومەنی ئاسایشی نێودەوڵەتی بڕیاریدا لە کانوونی یەکەمی 2025  کۆتایی  بە ئەرکەکانی یونامی لە عێراق بهێنێت.

ڕاگەیێنراوی فەرمی: نێردەی نەتەوە یەکگرتووەکان بۆ هاریکاریی عێراق (یونامی) ڕایگەیاند: سبەی سێشەممە کاتژمێر 10:00ـی بەیانی بەکاتی نیویۆرک و 6:00ـی ئێوارە بەکاتی بەغدا، ئەنجوومەنی ئاسایش لەسەر دۆخی عێراق کۆدەبێتەوە.

زانیاریی زیاتر: چاوەڕوان دەکرێت لە دانیشتنەکەدا، محەممەد حەسسان، نوێنەری تایبەتی سکرتێری گشتیی نەتەوە یەکگرتووەکان لە عێراق، راپۆرتێک  سەبارەت بە دواین پێشهاتەکانی عێراق و کارەکانی نێردەی نەتەوە یەکگرتووەکان (یونامی)  لەعێراق پێشکەش بکات.

ئەمەش بزانە: لە مانگی تەمموزی 2024، ئەنتۆنیۆ گۆتێرێس، ئەمینداری گشتی نەتەوە یەکگرتووەکان، محەمەد حەسسانی وەک نوێنەری تایبەتی خۆی و سەرۆکی نوێنەری هاریکاریی نەتەوەیەکگرتووەکان بۆ عێراق (یونامی) لە جێگای جینین پلاسخارت دەستنیشان کرد.