ئاڤای خەڵک؛ نزیکەی 500 فەرمانبەر لەبەردەم ئەنجوومەنی وەزیران گردبوونەوە

ئاڤا نیوز

نزیکەی 500 فەرمانبەری وەزارەتە جیا جیاکان لە بەردەم ئەنجوومەنی وەزیران گردبوونەوە و داواکاریی ئەوەیان هەیە بڕوانامەی بەدەستهاتوویان بۆ هەژمار بکرێت, وەزارەتی دارایش بەڵێنی دۆزینەوەی ڕێگا چارەیەکیان پێدەدات.

بەدواداچوونی ئاڤا: ئەمڕۆ نزیکەی 500 فەرمانبەری وەزارەتە جیا جیاکانی هەرێمی کوردستان لەبەردەم ئەنجوومەنی وەزیران گردبوونەوە، کە کێشەی "تەعدیل شەهادە و هەمواری داراییان هەیە"، ساڵانێکە داوا دەکەن ئەو بڕوانامانەی دوای دامەزراندنیان لە دامودەزگاکانی حکومەت بەدەستیان هێناوە بۆیان هەژمار بکرێت و پلەیان بەرز بکرێتەوە و مووچەکانیان زیاد بکرێت کە بڕوانامەی کەلۆریۆس و ماستەر و دکتۆران. 

لێدوانی فەرمی: مەسعود عەلی، نوێنەری ئەو فەرمانبەرانە دەڵێت: سێ جارە گرد دەبینەوە و دەنگمان ناگات، بۆیە ئەمجارە داوا لە ئاڤا دەکەین چارەسەرێکمان بۆ بدۆزێتەوە، ئێستا چارەسەرەکەمان لای وەزارەتی دارایی و ئابوورییە، بڕی ئەو پارەشی کە بۆمان زیاد دەکرێت نزیکەی 50 ملیۆن دینارە.

بۆچوونی لایەنی بەرامبەر: وەزارەتی دارایی و ئابووری دەڵێ: بەهۆی وەستانی پلە بەرزکردنەوە لە ساڵی 2016 و قەیرانی دارایی نەتواندراوە ئەو ژمارە فەرمانبەرە بڕوانامەکانیان بۆ هەژمار بکرێت و مووچەکانیان زیاد بکرێت، لەکاتی پلەبەرزکردنەوەی فەرمانبەران چارەسەرێکیان بۆ دەکەین.