دوو کەس لەسەر دزینی ئینگلاینی تاوەرەکانی کارەبا لە سلێمانی دەستگیر دەکرێن

ئاڤا نیوز

 

لەسەر دزینی ئینگلاین و ئاسنی تاوەرەکانی کارەبا لە سنووری سلێمانی هێزەکانی پۆلیس و ئاسایش دوو تۆمەتبار دەستگیر دەکەن.

 

وێنە گەورەکە: بەشێک لەو تاوەرانەی دەکەونە دەشتاییەکان لەلایەن کەسانی نەناسراو پارچەکانیان دەدزرێت، ئەم دیاردەیە لە زۆربەی ناوچەکانی هەرێمی کوردستان ڕوویداوە، ماوەیەک لە سنووری سلێمانیش ئینگلاین و ئاسنەکان لە تاوەرەکان دەدزرێن و بەڕێوەبەرایەتیی کارەبای سلێمانیش سکاڵای لەسەر ئەم بابەتە تۆمار کردووە.

 

لێدوانی فەرمی: شێخ ئەنوەر حەمە سەعید، بەڕێوەبەری کارەبای سلێمانی بە ئاڤا میدیای ڕاگەیاند، بەشێکی زۆر لەو تاوەرانەی دەکەونە دەشتاییەکان زۆرجار لەلایەن کەسانی نەناسراو پارچەکانی دەدزرێت و زیان بە خزمەتگوزاریی کارەبا دەگەیێنرێت، بەشی یاسایی بەڕێوەبەرایەتیی کارەبا بەردەوام چاکسازی لەو تاوەرانە دەکات و سکاڵا لەسەر ئەو دیاردەیە تۆمار دەکات، ئەم دیاردەیەش لە هەموو کوردستان هەیە، کەسانی نا بەرپرس ئەم کارە دەکەن.

 

زانیاریی زیاتر: شێخ ئەنوەر دەڵێت، دوای ئەوەی ژمارەیەک تاوەری کارەبا لە سنووری نێوان ناحیەی ئاشتی و ئاغجەلەر دەستکاری کران، هێزەکانی پۆلیس و ئاسایش توانییان دوو تۆمەتبار دەستگیر بکەن کە هەستاون بە لێکردنەوە و دزینی ئینگلاین و ئاسنی تاوەرەکان.

 

ئەمەش بزانە: بەپێی زانیارییەکان، دزەکان زیانیان بە هەشت تاوەری هێڵی 132 کەی ڤی (بازیان - ڕانیە) گەیاندووە، بۆیە تیمەکانی چاکسازی دەستبەجێ بەشێک لە ئاسنەکانیان بەستووەتەوە بۆ ئەوەی مەترسیی کەوتن لەسەر تاوەرەکان نەمێنێت، ئێستاش تۆمەتبارەکان لەژێر لێکۆڵینەوەدان و ڕووبەڕووی یاسا کراونەتەوە.