محەممەد حەسسان لە کۆبوونەوەی ئەنجوومەنی ئاسایش: دەبێت بکەرانی هێرشەکەی کۆرمۆر سزا بدرێن

ئاڤا نیوز

 

ئێوارەی ئەمڕۆ ئەنجوومەنی ئاسایشی نێودەوڵەتی تایبەت بە عێراق کۆبووەوە، لە کۆبوونەوەکەدا نوێنەری نەتەوەیەکگرتووەکان لە عێراق کۆتا وتاری پێشکەشکرد و ڕایگەیاند، پێکهێنانی کابینەی نوێی حکومەتی هەرێمی کوردستان و عێراق دەرفەتی چارەسەری کێشەکان بەگوێرەی دەستوور باشتر دەکات، نیگەرانیشی خۆیشی لە کردنە ئامانجی کێڵگەی کۆرمۆر خستەڕوو و داوای سزادانی بکەرانی کرد.

 

وێنە گەورەکە: نێردەی نەتەوە یەکگرتووەکان بۆ عێراق ساڵی 2003 دامەزراوە و ساڵی 2007 کارەکانی فراوان کردووە، لەسەر داوای حکومەتی عێراقیش کۆتایی ئەمساڵ کۆتایی بە کارەکانی دەهێنێت، بەڵام دامەزراوەکانی دیکەی نەتەوە یەکگرتووەکان لە کارەکانیان لە عێراق بەردەوام دەبن.

 

لێدوانی فەرمی: محەممەد ئەلحەسان، نوێنەری نەتەوە یەکگرتووەکان لە عێراق لە کۆبوونەوەی ئێوارەی ئەمڕۆی ئەنجوومەنی ئاسایش کۆتا وتاری نێردەی نەتەوەیەکگرتووەکانی بۆ عێراق پێشکەش کرد و ئاماژەی بەوەکرد، سەرەڕای تێپەڕبوونی ساڵێک بەسەر هەڵبژاردنی پەرلەمانی کوردستان، بەڵام تائێستا کابینەی نوێی حکومەتی هەرێمی کوردستان پێکنەهێنراوە و ئاستەنگی لەپێشە، لەبارەی کردنە ئامانجی کێڵگەی کۆرمۆریش " زۆر نیگەرانین و داوای ڕاگرتنی هێرشەکان و سزادانی بکەرانی دەکەین".

 

وتیشی، ئێستا عێراقییەکان بەشێوەیەکی ڕاستەقینە کار بۆ بونیادنانەوەی وڵاتەکەیان دەکەن و توانیویانە شەشەم هەڵبژاردن بەڕێوەبەرن کە  ئەمجارە ئاستی بەشداری تیایدا بەرزبوو، ئومێدەوارن حکومەتی عێراق بەبێ دواکەوتن پێکبهێنرێت و لەگەڵ کابینەی نوێی حکومەتی کوردستان، ببنە دەرفەتێک بۆ بەهێزکردنی پەیوەندییەکانی هەولێر و بەغدا و چارەسەری کێشەکان بەگوێرەی دەستوور و لەڕێگەی گفتوگۆ و پێکەوەکارکردن، بەتایبەتیش كێشەی ناوچە دابڕێنراوەکان کە پەیوەستە بە جێبەجێکردنی ماددەی 140ی دەستوور.

 

لەبارەی دۆخی ئاوارەکانیش، محەممەد ئەلحەسان ئەوەی خستەڕوو، شەڕی دژی داعش ئاستەنگی مرۆیی گەورەی دروستکرد و کاریگەرییەکانی تائێستاش بەردەوامن، بۆیەش پشتیوانیی لە گەڕانەوەی ئارەزوومەندانەی ئاوارەکان دەکەن و بەگرنگی دەزانن تەواوی عێراقییەکانی کەمپی هۆلیش بگەڕێنرێنەوە و تێکەڵ بە کۆمەڵگا بکرێنەوە.