بازرگانان و خاوەنكارانی كوردستان بانگهێشتی ئەمریكا دەكرێن

ئاڤا نیوز

بازرگانان و خاوەن كۆمپانیاكانی هەرێمی كوردستان بەمەبەستی بەشداریكردن لە پێشانگای نێودەوڵەتیی بەرهەمهێنان و پرۆسێسكردن، بانگهێشتی ئەمریكا دەكرێن.

چیرۆكی سەرەكی: لە ڕۆژانی 27 تاوەكو 29ـی مانگی یەكی ساڵی 2026، لە شاری ئەتلەنتا لە ویلایەتی جۆرجیا، پێشانگەی نێودەوڵەتیی بەرهەمهێنان و پرۆسێسكردنی كەلوپەلە خۆراكییەكان و بەرهەمە كشتوكاڵییەكان 2026IPPE بەڕێوەدەچێت، دەرفەت لەبەردەم بازرگانان و خاوەن كۆمپانیا كشتوكاڵی و خۆراكییەكان هەیە سوود لە ئەزموونی فراوانی ئەمریكا وەربگرن.

لێدوانی فەرمی: كامەران سەڵاح باجگر، جێگری سەرۆكی ژووری بازرگانی و پیشەسازیی هەولێر تایبەت بە ئاڤا ڕایگەیاند، بەشی بازرگانی و ئابووریی كونسوڵخانەی ئەمریكا لە هەولێر، هەماهەنگی لەگەڵ ژووری بازرگانی و پیشەسازی سەرجەم شارەكانی هەرێمی كوردستان كردووە و داوەتنامەی فەرمیی بۆ ژوورەكەمان ناردووە بۆ ئەوەی زۆرترین بازرگان و خاوەنكار، داواكاریی پێشكەش بكەن بەمەبەستی بەشداریكردن لەم پێشانگایە.

ئەوەی پێویستە بیزانیت: هەر بازرگانێک و خاوەن كۆمپانیایەک، ئەوانەی خوازیاری بەشداریكردنن لە پێشانگەكەی ئەمریكا، پێویستە ئەندامی ژووری بازرگانی و پیشەسازیی بن و سەردانی بەشی پەیوەندییەكانی ژوور بكەن، دوایین كات بۆ پێشكەشكردنی داواكاری، ڕۆژی 7 ـی ئەم مانگەیە.