ئەردۆغان: جەهەپە دەستی بە خوێنی کورد سوورە نەک ئێمە

ئاڤا نیوز

سەرۆککۆماری تورکیا جەخت لەوە دەکاتەوە بە هەمان بوێری 23 ساڵ لەمەوبەر لەگەڵ چارەسەرکردنی پرسی کورددان بە ڕێگاچارەی ئاشتییانە و دەڵێت: پێداگیرین لە نەهێشتنی شەڕوشۆڕ لە تورکیا و تەواوی ناوچەکە. خوا یار بێت ئەمجارە پرۆسەی ئاشتی دەگاتە ئەنجام.

چیرۆکی سەرەکی: ئەمڕۆ چوارشەممە، بە ئامادەبوونی ڕەجەب تەیب ئەردۆغان، سەرۆککۆماری تورکیا کۆبوونەوەی فراکسیۆنی ئاکپارتی لە پەرلەمانی تورکیا بەڕێوەچوو.

لێدوانی فەرمی: ڕەجەب تەیب ئەردۆغان، سەرۆککۆماری تورکیا ڕایگەیاند، لەپێناو چارەسەرکردنی کێشەکان و نەمانی شەڕوشۆڕ و پێکدادان کە نیو سەدەیە بەرۆکی تورکیای گرتووەتەوە، وەک ئاکپارتی و مەهەپە ڕیسکمان بە ژیانی خۆمان کردووە تاوەکو پرۆسەی ئاشتی بگاتە ئەنجام.

بەتەنیشت ئەم بابەتەوە: ئەردۆغان هۆشداری دەدات لەوەی لەگەڵ زیاتر بەرەوپێشبردنی پرۆسەی ئاشتی، ئەوانەش کە نانیان لە شەڕوشۆڕدایە هەوڵەکانیان چڕ دەکەنەوە و دەیانەوێت پرۆسەکە لەبار بەرن و زیانی پێ بگەیەنن.

ئەوەی پێویستە بیزانیت: ئەردۆغان لە وەڵامی ئۆزگور ئۆزەل، سەرۆکی گشتیی جەهەپە کە بە هۆی لێکنزیبوونەوەی دەم پارتی و ئاکپارتی بۆ پرۆسەی ئاشتی، بە ناڕاستەوخۆ دەم پارتی بە "عاشقی بکوژی خۆی" چوواند، دەڵێت: خوشک و برا کوردەکانم باش دەزانن بکوژەکەی کێیە و کێ ئەنجامدەری "کۆمەڵکوژی" دێرسیمە و خوێنی خوشک و برا کوردەکانمانی ڕشتووە.