ئاڤا زانیاری نوێ لەسەر ئەنجامی لێکۆڵینەوەکانی هێرشەکەی کۆرمۆر ئاشکرا دەکات

ئاڤا نیوز

ئەمڕۆ ئەو لیژنە باڵایەی بۆ لێکۆڵینەوە لە هێرشەکەی سەر کێڵگەی کۆرمۆر پێکهێنرابوو، لە بەغدا لەگەڵ سوودانی کۆبوونەوە و هەموو شتێکیان لەبارەی هێرشەکە بە ناوبراو وتووە، چاوەڕوان دەکرێت سوودانی لە نزیکترین کاتدا دەست بە لێپێچینەوە لەگەڵ هێرشکاران بکات.

وێنە گەورەکە: بڕیار بوو دوای 72 کاتژمێر لە دەستپێکردنی کارەکانی لیژنەی باڵای ئەمنی بۆ لێکۆڵینەوە لە هێرشەکەی کۆرمۆر ئەنجامەکەی ڕابگەیێنرێت، بەڵام وادەکە تێپەڕی و ئەمڕۆ لیژنەکە لەگەڵ سەرۆکوەزیرانی عێراق کۆبوونەوە.

ڕێبەر ئەحمەد، وەزیری ناوخۆی کوردستان، وەزیری ناوخۆی عێراق و سەرۆکی دەزگای هەواڵگری و هەموو بەرپرسە باڵا ئەمنییەکانی عێراقیش بەشدار بوون. 

لیژنەکە هەموو زانیارییەکانی دەستکەوتووە، کێ هێرشی کردووە، لە کوێ کراوە، بە چی کراوە، ئەمانە هەمووی بە ڕاپۆرتێک بە سوودانی دەدەن.

ئەوەی پێشبینی دەکرێت: چاوەڕوان دەکرێت سوودانی لە نزیکترین کاتدا دەست بە لێپێچینەوە لەگەڵ هێرشکاران بکات.

لێدوانی فەرمی: سەرچاوەیەکی ئەمنی ئاگادار کرد لەبارەی ئەنجامی لیژنەکە بە ئاڤای وت، هێرشەکە لە سێگۆشەی دووزخورماتوو - ئامرلی و سلێمان بەگ کراوە، واتا لەنێوان پارێزگاکانی کەرکووک و سەڵاحەدین و دیالە.

سەرچاوەکە ئاماژەی بەوەشکرد، هێرشەکە بە درۆن و مووشەک کراوە، سەرەتا بە درۆن کێڵگەی کۆرمۆریان کەشف کردووە، دواتر مووشەکیان تێگرتووە. ئەم شوێنەی هێرشەکەشی لێ کراوە، کەمتر لە 50 کیلۆمەتر لە کۆرمۆرەوە دوورە.

زانیاریی زیاتر: لەبارەی ئەوەی کێ هێرشەکەی کردووە، سەرچاوە ئەمنییەکە وتی هێزەکانی حەشد لە سنوورەکە باڵادەستن.