ئەنجامدەرانی هێرشی سەر کۆرمۆر و ئەنجامی لێکۆڵینەوەکە ئاشکرا کرا

ئاڤا نیوز

محەممەد شیاع سوودانی، فەرماندەی گشتی هێزە چەکدارەکان، ئەنجامی لێکۆڵینەوەکانی تایبەت بە هێرشکردنە سەر کێڵگەی غازی کۆرمۆری پەسەند کرد. بەگوێرەی ئەنجامەکان، هێرشەکە لە سنووری "خورماتوو" ئەنجامدراوە و ناسنامەی ئەنجامدەرانیش ئاشکرا کراوە کە کەسانی لەیاسا دەرچوون.

چیرۆکی سەرەکی: دوای ئەوەی ڕۆژی 26ـی 11ـی 2025 هێرشکرایە سەر کێڵگەی کۆرمۆر، لیژنەیەکی باڵای ئەمنی بە سەرۆکایەتی وەزیری ناوخۆی عێراق و ئەندامێتی وەزیری ناوخۆی کوردستان و دەزگا ئەمنییەکان دەستبەکاربوو. ئەمڕۆ ئەنجامەکان خرانە بەردەم فەرماندەی گشتی هێزە چەکدارەکان و دەرکەوت هێرشەکە بە دوو درۆن بووە، کە لە ناوچەکانی ڕۆژهەڵاتی قەزای خورماتووەوە (باشووری کێڵگەکە) ئاراستە کراون. 

ڕاگەیێنراوی فەرمی: لە ڕاگەیێنراوێکدا فەرماندەی گشتی هێزە چەکدارەکان دەڵێت، "گەیشتووینەتە ناوی ئەو کەسانەی هێرشەکەیان ئەنجامداوە، کە کۆمەڵێک کەسی لەیاسا دەرچوون و بەشێکیان فەرمانی دەستگیرکردنیان هەیە و دەزگا ئەمنییەکان بەدوایانەوەن. دوای دیاریکردنی ناسنامەکانیان، دەستکراوە بە کۆکردنەوەی بەڵگەی هونەری بۆ ئەوەی ڕادەستی دادگا بکرێن".

لەلایەکی دیکەوە: لیژنەکە چەند بڕیارێکی گرنگی بۆ پاراستنی کێڵگەکە دەرکردووە، لەوانە:

• بڵاوەپێکردنەوەی هێزەکان لە کەرتی ڕۆژهەڵاتی سەڵاحەددین و گۆڕینی فەرماندە ئەمنییەکانی ئەو سنوورە (سوپا، پۆلیس و حەشدی شەعبی) بە فەرماندەی کارامەتر.

•  وەزارەتی بەرگری بە هەماهەنگی لەگەڵ حکومەتی کوردستان سیستەمی بەرگریی ئاسمانی بۆ کێڵگەی کۆرمۆر دابین دەکات.

• ئاراستەکردنی داواکاری بۆ ئەنجوومەنی باڵای دادوەری بۆ پێکهێنانی لیژنەیەک لەگەڵ ئاژانسە ئەمنی و هەواڵگرییەکان بە مەبەستی بەدواداچوون بۆ لێکۆڵینەوە لە دۆسیەکەدا.

٠ سەپاندنی ڕێکاری تووند بۆ بەکارهێنان و گواستنەوەی فڕۆکەی بێفڕۆکەوان بە هەموو جۆرەکانیەوە، تەنیا بە ڕەزامەندی فەرمیی لایەنە پەیوەندیدارەکان نەبێت.


زانیاریی زیاتر: ڕاگەیێنراوەکە دەڵێت، لێکۆڵینەوەکان بۆ گەیشتن بە تەواوی ئەوانەی لەم ڕووداوەدا تێوەگلاون بەردەوامە. حکومەتی عێراق جەختدەکاتەوە کە ئەمە کارێکی تیرۆریستی مەترسیدارە و ئامانج لێی لێدانە لە ئابووری و سەروەری عێراق و دواخستنی سەقامگیرییە، بۆیە بەبێ سزادان تێناپەڕێت و ڕێکاری یاسایی تووند بەرامبەر بکەرانی دەگیرێتەبەر.