یەكێتی بۆ كەیسی بەرپرسی كۆمیتەی خەبات داوای پێكهێنانی لیژنەیەكی بێلایەن دەكات

ئاڤا نیوز

 

مەڵبەندی سێی یەكێتی لە هەولێر، بڵاوكردنەوەی دانپێدانانی تۆمەتبارێكی ڕووداوەكانی خەبات و لاجان كە كادیرێكی ئەو حیزبەیە، بە هەڵبەستنی تۆمەت و "كەیسی دروستكراو" ناودەبات و داوا پێكهێنانی لیژنەیەكی بێلایەن دەكات.

 

وێنە گەورەکە: ڕۆژی شەممە 29ـی تشرینی دووەم، گرژی و ئاڵۆزی لەسەر ڕێگەی گوێڕ - هەولێر لە نزیك گوندی لاجان دروستبوو، كۆمەڵە کەسێک رێگای تانکەرەکانی گواستنەوەی سووتەمەنی و هاووڵاتیانیان لە سنووری گوێڕ گرت و تەقەیان بەسەر خەڵک و ڕێبوارانی ئەو ڕێگایەدا کرد، لە ئەنجامی تەقەی ئەو کەسانەدا دوو کەس گیانیان لە دەست دا و ژمارەیەک کەسی تریش بریندار بوون.

 

پەیوەست بەم بابەتە: ئێوارەی ئەمڕۆ پێنجشەممە 4ـی كانوونی دووەم، ئەنجوومەنی ئاسایشی هەرێمی كوردستان، دانێپدانانی نێچیروان عیسا، بەرپرسی کۆمیتەی یەکێتیی نیشتمانیی کوردستان لە قەزای خەبات بڵاو کردەوە، كە بە هاوكاریی چەند لایەنێكی ناوخۆیی و دەرەكی، لەگەڵ ژمارەیەك تۆمەتباری دیكە، دەستیان لە پشێوییەكان هەبووە، لەچوارچێوەی درێژكراوەی زنجیرەیەك پیلانی تێكدەرانە كە ماوەیەكە دژی هەرێمی كوردستان نەخشەی بۆ كێشراوە.

 

ڕاگەیێنراوی فەرمی: مەڵبەندی سێی یەكێتی لە هەولێر، لە ڕاگەیێنراوێكدا كەیسی تۆمەتبار نێچیروان هەركی، بەرپرسی کۆمیتەی یەکێتی لە خەبات، بە كەیسێكی حیزبی و دروستكراو ناو دەبات، هەرسێ سەرۆكایەتیی هەرێمی كوردستان، ئەنجوومەنی وەزیران و ئەنجوومەنی دادوەری و دەستەی سەربەخۆی مافی مرۆڤ و سەرجەم كۆنسوڵخانە و نوێنەرایەتیی وڵاتان ئاگادار دەكاتەوە كە لیژنەیەكی بێلایەن بۆ ئەو كەیسە پێكبهێندرێت، تەواوی ڕاستییەكان بۆ هەموو لایەك ساغ بكرێتەوە.