ئاڤای خەڵک؛ گرفتی تەکنیکی لە دوو وێستگە کارەبای گەڕەکی کوێستانی هەولێری بڕیوە

 

ئاڤا نیوز

بەڕێوەبەری دابەشکردنی کارەبای یەکی هەولێر ڕایدەگەیەنێت، بەهۆی دروستبوونی گرفتی تەکنیکی لە هەردوو وێستگەی "شۆڕش" و "نووسەران"، پێدانی کارەبا بە گەڕەکی کوێستان تووشی گرفت بووە و لە ئێستادا تیمەکانیان سەرقاڵی چارەسەرکردنی کێشەکەن.

 

چیرۆکی سەرەکی: پێشتر دانیشتووانی گەڕەکی کوێستان نیگەرانییان دەربڕیبوو و ئاماژەیان بەوە دابوو، دوێنێ کارەباکەیان بەردەوام دەهاتەوە و دەپچڕا، ئەمڕۆش زۆربەی کاتەکان بێ کارەبا بوون.

لێدوانی فەرمی: تاڤگە عومەر کاکەسوور، بەڕێوەبەری دابەشکردنی کارەبای یەکی هەولێر بۆ ئاڤا ئاشکرای کرد کە هۆکاری سەرەکیی نەمانی کارەبا لەو گەڕەکە بۆ بوونی کێشەی هونەری لە وێستگەکانی دابەشکردن دەگەڕێتەوە.

 

چارەسەرەکان: دڵنیایی دا کە تیمە هونەرییەکان لە هەوڵی چڕدان بۆ ئەوەی هەرچی زووە گرفتەکە چارەسەر بکەن و دۆخی کارەبای گەڕەکی کوێستان ئاسایی ببێتەوە.