شێخ دارا هۆشداری لە تۆفان و بارانی بەلێزمە دەدات: پێنج ڕۆژ بەردەوام دەبێت

ئاڤا نیوز

 

شەپۆڵێكی چڕی بارانبارینی بەلێزمە و تۆفان و باوبۆران ناوچە جیاجیاكانی هەرێمی كوردستان دەگرێتەوە، ماوەی پێنج ڕۆژ بارانبارین بەردەوام دەبێت و لە هەندێك ناوچە ئاستی بارانبارین دەگاتە 300 ملیمەتر.

 

وێنە گەورەكە: هێشتا كاریگەریی شەپۆڵە وشك و ساردەكەی جەمسەری باكوور بەسەر هەرێمی كوردستان ماوە، لە ناوچەكانی سلێمانیش مەزەندەی ڕەشەبای لێ دەكرێت، خێرایی با لەنێوان 30 كیلۆمەتر تاوەكو 40 كیلۆمەترە، هاوكات شەپۆڵێكی چڕی تۆفان و بارانی بەلێزمە كە لە دەریای ناوەڕاستەوە دەستیپێكردووە، دەگاتە هەرێمی كوردستان و هەفتەیەكی تەڕ و بە باران چاوەڕوانی ئاسمانی كوردستانە.

 

لێدوانی فەرمی: شێخ دارا، پێشكەشكاری كەشوهەوای ئاڤا پێشبینی دەكات، شەپۆڵێكی بارانبارینی چڕ، سەرەتای هەفتەی داهاتوو هەرێمی كوردستان بگرێتەوە، ڕۆژانی دووشەممە و سێشەممە ڕێژەی بارانبارینە زیاتر بەرز ببێتەوە و ئەگەری بەفربارینیش لە ناوچە شاخاوییەكان هەیە. 

 

ئەوەی پێشبینی دەكرێت: پێشبینی دەكرێت ئاستی بارانبارین لە ناوچەكانی دهۆك بگاتە نزیكەی 300 ملم، ئەگەری بەفربارینیشی تێدایە، لە هەولێر پێشبینی بارینی 120 ملم باران دەكرێت، شەپۆڵەكە لە شەممەوە 6ـی كانوونی دووەمەوە دەستپێدەكات و تاوەكو شەممەی هەفتەی دواتر 13ـی هەمان مانگ بەردەوام دەبێت، بە تێكڕاش پێنج ڕۆژ بەسەریەكەوە بارانبارین بەردەوام دەبێت.